Muqdisho (Caasimada Online) – Wafdi sare oo ka socda dowladda Turkiga ayaa maanta magaalada Muqdisho ka bilaabay kulamo siyaasadeed oo ay la leeyihiin madaxda dowladda iyo siyaasiyiinta mucaaradka, si loo yareeyo xiisadaha siyaasadeed ee ka taagan caasimadda.
Sida ay ogaatay Caasimada Online, wafdiga ayaa kulankii ugu horreeyay la yeeshay Madaxweynaha Soomaaliya, Xasan Sheekh Maxamuud, iyagoo ka wada-hadlay xaaladda siyaasadeed ee dalka iyo arrimaha la xiriira doorashooyinka la filayo inay ka dhacaan dalka.
Sidoo kale, wafdiga Turkiga ayaa kulan gaar ah la qaatay Madaxweynihii hore ee Soomaaliya, Maxamed Cabdullaahi Farmaajo, oo ka mid ah siyaasiyiinta sida weyn uga aragti duwan dowladda federaalka.
Xubnaha wafdiga ayaa sidoo kale la kulmay hoggaanka Xisbiga Haybad Qaran, iyagoo dhageystay aragtidooda ku aaddan xaaladda siyaasadeed iyo hannaanka doorashooyinka dalka.
Xogaha ayaa tilmaamaya in wafdigu qorsheynayo inuu saacadaha soo socda kulan la yeesho hoggaamiyaha Xisbiga Wadajir, Cabdiraxmaan Cabdishakuur Warsame, si ay uga xog wareystaan mowqifkiisa ku aaddan arrimaha taagan.
Sidoo kale, waxaa la filayaa in caawa ay wada-hadallo gaar ah la yeeshaan Ra’iisul Wasaarihii hore ee Soomaaliya, Xasan Cali Kheyre, iyo Madaxweynihii hore, Sheekh Shariif Sheekh Axmed, kuwaas oo ka tirsan madasha siyaasiyiinta mucaaradka.
Ilo xog-ogaal ah ayaa u sheegay Caasimada Online in Madaxweyne Xasan Sheekh Maxamuud uu muujiyay diyaar u ahaansho ku aaddan in laga wada-hadlo arrimaha muranka dhaliyay, gaar ahaan hannaanka doorashooyinka, si loo gaaro is-afgarad siyaasadeed.
Xogta la helayo ayaa sidoo kale tilmaamaysa in dhinacyada siyaasadda ay isku afgarteen in la magacaabo guddi farsamo oo ka shaqeeya qodobbada la isku hayo, isla markaana diyaariya hannaan lagu xallin karo khilaafaadka jira.
Dowladda Turkiga ayaa si toos ah u hoggaamineysa dadaalladan dhex-dhexaadinta ah, iyadoo ka walaacsan in khilaafaadka siyaasadeed ay saameyn ku yeeshaan maalgashiga, taageerada iyo mashaariicda horumarineed ee ay sannadihii la soo dhaafay ka fulisay Soomaaliya. Turkiga ayaa daneynaya in la helo xasillooni siyaasadeed oo sii xoojisa iskaashiga iyo xiriirka labada dal.