Dubai (Caasimada Online) – Israa’iil ayaa intii uu socday dagaalkii Iiraan si qarsoodi ah ciidamo gaar ah iyo xubno sirdoon ugu dirtay dalka Azerbaijan, sida lagu sheegay warbixin ay baahisay CNN.
Warbixinta ayaa lagu sheegay in tallaabadan ay qayb ka ahayd shabakad ballaaran oo fariisimo iyo goobo qarsoodi ah oo Israa’iil ku lahayd dalal kala duwan oo ku yaalla Bariga Dhexe.
Sida ay sheegeen ilo xog-ogaal ah, ciidamadaas ayaa ka hawlgalayay dhowr goobood oo ku yaalla koonfurta Azerbaijan, meel u dhow xadka Iiraan.
Qaar ka mid ah goobahaasi ayaa la sheegay inay qiyaastii 60 mayl u jireen magaalada Tabriz ee dalka Iiraan, oo ka mid ahayd magaalooyinkii ay Israa’iil weerartay intii uu dagaalku socday.
Ilo kale ayaa sheegay in halkaas la geeyay ciidamada gaarka ah ee Israa’iil, kuwaas oo qabtay hawlo sirdoon, ururinta xogta iyo hawlgelinta diyaaradaha aan duuliyaha lahayn.
Tani waxay Israa’iil siisay fursad ay si dhow ugala socon karto xaaladda waqooyiga Iiraan iyo dhaqdhaqaaqyada ka socda halkaas.
Warbixintu waxay sheegtay in hawlgalka Azerbaijan uu ka mid ahaa shabakad saldhigyo iyo goobo qarsoodi ah oo Israa’iil ku lahayd dalal kala duwan oo gobolka ah.
Waxaa la sheegay in goobo kale ay ku yaalleen Ciraaq, Isutagga Imaaraadka Carabta iyo Somaliland.
Markii hore, goobahan waxaa loo qorsheeyay inay noqdaan meelo gurmad iyo samatabbixin loogu talagalay haddii ay dhacdo xaalad degdeg ah.
Si kastaba, markii dambe waxay isu beddeleen xarumo ciidan iyo sirdoon oo door weyn ka qaatay hawl-galladii Israa’iil.
Sida warbixintu sheegtay, saldhigyadan ayaa Israa’iil u suurtageliyay inay ciidamo ku ururiso goobo u dhow waqooyiga, galbeedka iyo koonfurta Iiraan, taasoo u sahashay inay sii waddo weerarro badan oo gudaha dalkaas ah.
Mid ka mid ah ilaha ayaa sheegay in hawlgalka ka socday dhinaca Azerbaijan ay ka qayb qaadanayeen dhowr iyo toban askari oo ay ku jireen ciidamada gaarka ah ee Israa’iil, ciidamada samatabbixinta hawada iyo xubno ka tirsan sirdoonka Mossad.
Dhanka kale, safaaradda Azerbaijan ee Mareykanka ayaa si adag u beenisay warbixinta, iyadoo sheegtay inaysan jirin wax saldhig ama hawlgal noocaas ah oo laga fuliyay dhulka Azerbaijan.