Nairobi (Caasimada Online) – Madaxweynaha Kenya Uhuru Kenyatta ayaa Sabtida maanta ah taageeray in ninkii ay mar xifaaltami jireen uu noqdo madaxweynaha cusub, toddobaadyo kadib markii xisbiyadooda ay isku biireen, kahor doorashooyinka madaxweynaha iyo baarlamanka ee dhacaya bisha August.
“Waxaan Raila Odinga u dooranay, ayada oo aysan wax diidmo ah ku jirin, inuu noqdo madaxweynaha shanaad ee Kenya,” ayuu Kenyatta u sheegay kumanaan dadweyne oo isugu soo baxay caasimadda Nairobi.
Ku dhowaaqista ayaa isku keeneysa labada qoys ee ugu sarreeya siyaasadda Kenya, kuwaas oo taraiikh u lahaa inay iska soo horjeestaan.
Hase yeeshee 2018-kii, Kenyatta iyo Odinga ayaa ka yaabiyey dalka markii ay is-gacan qaadeen kuna dhowaaqeen heshiis kadib rabshadihii xigay doorashadii 2017 oo tobanaan qof ay ku dhinteen.
Bishii tagtay, xisbiga Jubilee ee Kenyatta ayaa ku dhowaaqay inuu ku biirayo isbaheysiga Azimio la Umoja ee uu hoggaamiyo Odinga.
Sabtida maanta, Kenyatta ayaa ku dhowaaqay inuu taageerayo hoggaamiyaha mucaaradka ee da’da ah, isaga oo yiri “Wax shaki ah noogama jiro inaan haysano kabtan koox oo ah Raila Amolo Odinga.”
Odinga, oo 77 jir ah, ayaa ku jawaabay isaga oo sheegay in safarkooda ka yimid loolan doorasho oo qaraar ee isku beddelay saaxiibo siyaasadeed “uu ahaa mid aan wax la mid ah lagu arag taraiikhda dalkeena.”
“Waxaan aqbalayaa magacaabistan aniga oo ka mahad-celinaya una huraya dadkeena,” ayuu yiri.
Ku dhowaaqista ayaa sidoo kale timid kadib markii ninkii loo arkay inuu beddelayo Kenyatta ee William Ruto, oo sidoo kale ah musharax madaxweyne, laga eryey xisbiga Jubilee.
Ruto oo 54 jir, islamarkaana uu Kenyatta, mar u diyaarinayey inuu beddelay, ayaa ka war helay in dhinac loo riixay kadib heshiiskii ay 2018 gaareen Kenyatta iyo Odinga.
Ruto ayaa doonaya inuu beddeo xaaladda soo jireenka ah ee Kenya, islamarkaana meesha ka saaro qoysaska xukunka iska haysta, isaga oo ula jeeda qoysaska Kenyatta iyo Odinga oo tobanaan sano maamulayey siyaasadda Kenya.
Kenya ayaa waxaa caadiyan madaxweyne kasoo noqday rag kasoo jeeda qabiilada awoodda badan ee Kikuyu oo uu kasoo jeedo Kenyatta ama qabiilka Ruto uu kasoo jeedo ee Kalenjin.
Doorashada sanadkan ayaa waxaa ku loolamaya Ruto iyo Odinga oo kasoo jeeda qabiilka Luo.
