Hargeysa (Caasimada Online) – Hay’adda Caafimaadka Adduunka ee WHO ayaa cambaareysay duqeymo lagu eedeeyay inay Somaliland ka geysatay Laascaanood, kuwaasi oo burburiyay goob caafimaad oo ku yaalla magaaladaasi.
WHO ayaa sheegtay in ay ka xun tahay, islamarkaana ay cambaareynayso weerarkaasi, ayada oo si cad u sheegtay in goobaha caafimaad aysan noqon karin bartilmaameed.
Weerarkaasi oo ay hay’addu sheegtay inuu dhacay saddex maalin kahor, iyada oo sheegtay inuu ka dashay khasaare iskugu jira dhimasho iyo dhaawac.
Madaxa hay’adda, Tedros Adhanom oo qoraal soo dhigay bartiisa Twitter-ka ayaa waxa uu ku shaaciyay in khasaaraha uu intiisa badan soo gaaray shaqaalaha caafimaadka iyo bukaanadii ku jiray isbitaalkaas.
“WHO waxay cambaareeynaysa weerarkii lagu qaaday xarun caafimaad oo ku taal Laascaanood, kaas oo sababay dhimasho iyo dhaawac, oo ay ku jiraan shaqaalaha caafimaadka iyo bukaannada. – Caafimaadku ma ahan bartilmaameen.”
Hoggaanka SSC ayaa ku eedayay millateriga Somaliland in ay fuliyeen duqaymo burburiyay qaybo kamid ah isbitaalka magaalada Laascaanood ee xarunta gobolka Sool.
Somaliland ayaa dhankeeda dhowr jeer iska fogeysay inay bartilmaameedsadeen goobaha caafimadka, xilli billihii dambe uu dagaal ka socday magaalada Laascaanood oo ay isku horfadhiyaan ciidamada Somaliland iyo kuwa deegaanka ee SSC.
Si kastaba, labada dhinac ayaa ka dhaga fureystay baaqyada caalamiga ah ee joojinta dagaalka, ayada oo dhinac walba uu shuruud horleh ku xiray xabad joojin ka dhaqan-gasha Laascaanood.
