29 C
Mogadishu
Saturday, January 18, 2020
Home Warar Xiisad ka taagan Gaalkacyo kadib markii la diiday xil ka qaadis uu...

Xiisad ka taagan Gaalkacyo kadib markii la diiday xil ka qaadis uu sameeyey Xaaf

Gaalkacyo (Caasimada Online) – Wararka naga soo gaaraya gobolka Mudug ayaa sheegaya in khilaaf hor leh uu ka soo cusboonaaday Gaalkacyo, kadib markii shalay madaxweynaha Galmudug uu xil ka qaadis ku sameeyey mas’uuliyiinta degmadaasi.

Duqa magaalada Gaalkacyo Xirsi Yuusuf Barre oo la hadlay warbaahinta ayaa ka horyimid xil ka qaadista lagu sameeyey, isaga oo waxba kama jiraan ku tilmaamay.

Xirsi ayaa carabka ku dhuftay in xilligaan Madaxweyne Axmed Ducaale Geelle (Xaaf) uusan xil ka qaadis iyo magacaabis toona sameyn karin, sidaa daraadeedna uu weli yahay duqa magaalada Gaalkacyo ee xarunta gobolka Mudug.

Sidoo kale wuxuu hoosta ka xariiqay inuu xil ka sii heyn doono illaa madaxweyne cusub loo dooran doono hoggaanka dowlad goboleedka Galmudug.

Duqa magaalada Gaalkacyo Xirsi Yuusuf Barre ayaa hadda ku sugan Dhuusamareeb, wuxuuna qeyb ka yahay ololaha doorashada Galmudug ee ka socda magaaladaasi.

Xaaladda guud ee Galmudug oo weli is jiid jiid ku jirto ayaan la ogeyn sida xal looga gaari karo khilaafka ka taagan dhismaha maamulkaasi oo la doonayo inuu noqdo mid loo dhan yahay.