Muqdisho (Caasimada Online) – Xisbiga Himilo Qaran ee uu hoggaamiyo Madaxweynihii hore ee dowladdii KMG aheyd, Sheekh Shariif Sheekh Axmed ayaa si xooggan u cambaareeyay tallaabooyinka ay sii waddo dowladda Soomaaliya ee la xiriira barakicinta dadka shacabka ah ee deggan caasimada.
Warsaxaafadeed kasoo baxay Xisbiga ayaa waxaa si adag looga hadlay howlgal burburin ah oo dowladdu ka waddo xaafadda Warlaliska ee degmada Dayniile, iyada oo Himilo Qaran ay sheegtay in awood loo adeegsanayo dadkaasi
Waxaa kale oo uu Xisbigu sheegay in dareenka xanuunka leh la qaybsanayo shacabka la barackiyay, sidoo kalena uu utacsiyeynayo qoysaska ay dhibaatada soo gaartay.
“Xisbiga Himilo Qaran wuxuu si adag u cambaareynayaa dilka, dhaawaca iyo barakicinta sharci-darrada ah ee lagu hayo shacabka ku dhaqan deegaanka Warlaliska ee Degmada Dayniile, kuwaas oo ay saakay si arxan-darro ah ula dhaqmeen ciidanka Booliska Soomaaliyeed” ayaa lagu warka qoraalka ah.
Sidoo kale, Xisbiga Himilo Qaran ayaa weerarkan ku eedeeyay taliska qaybta guud ee Booliska Gobolka Banaadir ee uu hoggaamiyo Macallin Mahdi, isaga oo sheegay in wado dhibaatooyin ka dhan ah shacabka ku dhaqan Muqdisho
“Xisbiga Himilo Qaran wuxuu si gaar ah mas’uuliyadda falalkan dusha uga saarayaa Taliska Booliska Gobolka Banaadir oo iyagu caadeystay tacadiyada joogtada ah iyo gabood fallada ka dhanka ah shacabka ku nool caasimadda dalka” ayaa lasii raaciyay warsaxaafadeedka
Xisbigu wuxuu intaasi ku daray in falalkan lagula xisaabtami doono taliska, isla markaana ay cambaareynayaan sida loo maareeyay dhulka danta guud.
Indhowaanahan dowladda dhexe ayaa wadday howlo burburin ah, waxaana lagu kala baxay xaafado dhowr ah oo ku yaallay gudaha caasimada.
