Muqdisho (Caasimada Online) – Waxaa lagu wadaa in magaalada Muqdisho ee caasimada Somalia ay soo gaaran Xubno cusub oo la wareegi doona Protocol-ka Madaxweynaha dalka Maxamed C/llaahi Farmaajo.
Xubnahaani ayaa waxaa lagu bedeli doonaa 11 Xubnood oo kamid ah Kooxda Protocol-ka Madaxweynaha kuwaa oo iminka uu kala diray Agaasimaha cusub ee Villa Somalia Fahad Yaasiin.
Xubnahaani ayaa waxaa Tababaro iyo Siminaaro dhanka Protocol-ka ah loogu qaaday magaalada Qahira ee dalka Masar, kuwaasi oo loo mudeeyay dhowr asbuuc.
Protocol-ka cusub ayaa waxaa dhamaantooda laga soo dhex xulay garabka Madaxweynaha ugu jiray ololaha doorashada kuwaasi oo gaaraya ilaa 15 Xubnood oo u badan dhalinyaro u dhexeysa 25 ilaa 35.
Protocol-ka Madaxweynaha ee la kala diray ayaa waxaa lala sugaayay kuwa cusub ee loo diyaariyay Madaxweynaha, waxaana suuragal ah inay kasii bataan tirada loogu tallo galay.
Geesta kale, waxaa arrin layaab leh loo arkaa in 11 xubnood hal mar laga eryo Madaxtooyada, taasoo ah dhaqan keli talisnimo oo uu la soo baxay Agaasimaha cusub ee Madaxtooyada Fahad Yaasiin.
Caasimada Online
Xafiiska Muqdisho
[email protected]