Muqdisho (Caasimada Online) – Wasaaradda Arrimaha Gudaha ee dalka Uganda ayaa qeyla dhaan kasoo saartay isticmaalka Ajaaniibta farahabadan ee Baasaboorka Ugandha.
Sarkaal ka tirsan Wasaaradda Arrimaha Gudaha ayaa Wargeyska The Monitor u sheegay in Wasaaradu ay wado baaritaan la xiriira sifo sharci darro ah oo lagu bixiyo Baasaboorka Ugandha.
Sarkaalka ayaa sheegay inay Jiraan Saraakiil ka tirsan Booliska oo Shaqsiyaad Ajaaniib ah oo u badan Soomaali sifo sharci darro ah uga iibsada Baasaboorka Ugandha.
Waxa uu sheegay in Baasabooro aan cadadkooda la sheegi karin lagu bixiyay sifo sharci darro ah, kuwaa oo inta badan laga iibsaday Soomaalida ku dhaqan Ugandha.
Anthony Namara oo ah Taliyaha Kontoroolka Waaxda Socdaalka ee dalkaasi, ayaa isna xaqiijiyay in Baasaboorada Ugandha ay isticmaalan Ajaaniib aan lasoo marin Wasaarada iyo dhinacyada qaabilsan Baasaboorada waxa uuna cadeeyay in Howsha Wasaarada ay faraha kula jiraan Saraakiil Boolis ah oo aan loo idman howshaasi.
Anthony Namara, waxa uu sheegay in iminka uu socdo baaritaan isla markaana gacanta lagu hayo Shaqsiyaad ka tirsan Booliska oo sifo sharci darro ah ku iibsada Baasaboorka.
Waxa uu intaa ku daray in baaritaanka socda ay qeyb ka noqon doonaan Qaxooti Soomaali ah oo iyagu lagu helay Baasaboorada Ugandha kuwaa oo si dhow u fangareynaayay Saraakiisha.
Taliyaha Kontoroolka Waaxda Socdaalka ee dalkaasi, Anthony Namara waxa uu xusay in Qaxootiga baaritaanadda ku socdaan ku jiraan Somali, Eritrean, Burundian, Rwanda iyo kuwo u dhashay dalka Kongo.
Dhinaca kale, waxa uu ku baaqay in mudada ay socto baaritaanka aysan dalka ka bixin shaqsiyaadka uu ku fooraaro kiiska Musuqa iyo iibsashada Baasaboorka.
Caasimada Online
Xafiiska Muqdisho
[email protected]