Muqdisho (Caasimada Online) – Waxaa soo baxday fadeexo ku aadan inuu Taliyaha Ciidamada Xoogga Soomaaliya XDS S/Gaas Maxamed Aadan Axmed uu mushaarkii Ciidamada Militariga ku sugan Muqdisho u leexiyey kuwa kale oo joogo Puntland.
Warkaas ayaa banaanka imaaday kadib markii ay ciidamo ka tirsan Militariga ay banaanbaxyo ka sameeyeen Magaalada Muqdisho markaas oo ay xireyn jidadkii ugu muhiimsanaa iyagoo ka cabanayey mushaar la’aan.
Haddaba warkaas kadib waxaa soo baxay warar kale oo sheegayo inuu taliyaha iska casilay xilkii uu dowladda u hayey, waxaana arrintaas ka hadlay isla taliyaha oo ku tilmaamay inay tahay warar been abuur ah.
XDS S/Gaas Maxamed Aadan Axmed ayaa beeniyey inuu xilkiisa iska casilay inuu ku tilmaamay wararka sheegayo inuu leexiyey mushaarkii ciidamada Militariga kuwa been abuur ah oo lala xisaabsami doono ciddii faafisay.
Taliyaha ayaa sheegay in warkaas ay faafiyeen shaqsiyaad dano gaar ah leh oo aan fiirineyn midda qaranka sida uu hadalka u dhigay wuxuuna ka dhawaajiyey inaan sidaas la isaga hari doono oo la isla xisaabtami doono.
Taliyaha ayaa warkaas ku tilmaamay inuu yahay mid raqiis ah oo aan lugo laheyn xilli uu u waramayey idaacadda Dowladda ee Radio Muqdisho, isagoo sheegay inay la yaab ku noqotay warkaas.
Taliyaha ciidamada Xoogga ayaa lagu eedeeyey inuu Puntland u leexiyey mushaarka ciidamada muddo 14 bilood ah waxaana soo baxay warar sheegayo inay arrintaas la ogeyd dowladdii Xasan Shiikh Maxamuud iyo Ra’isulwasaarihii hore Cumar Cabdirashiid.
Mushaarka la leexiyey ayaa waxaa dhiibi jirtay dowladda Mareekanka oo ku dhawaad toban kun oo askari bil kasta dhiibto mushaarkooda waxayna ciidamadaas mushaar la’aan yihiin muddo 14 bilood ah laga soo bilaabao sanadkii 2016.
Caasimada Online
Xafiiska Muqdisho
[email protected]