Muqdisho (Caasimada Online) – Ra’isul wasaaraha Ethiopia Hailemariam Desalegn, ayaa isku diyaarinaaya inuu dib ula soo laabto kalsoonidii kala dhexeysay Dowlada Somalia burburtay tan iyo markii 8 Feb,2017 la doortay Madaxweynaha Somalia Maxamed C/llahi Farmaajo.
Hailemariam Desalegn, ayaa dib usoo celinta kalsoonida kaga faa’iideysan doono Shirweynaha Khaaska ah ee Hoggaamiyayaasha Urur gobaleedka IGAD oo maalinta Sabtida ee soo socota ka furmi doona magaalladda Nairobi eexarunta dalka Kenya.
Hailemariam Desalegn, ayaa kullankiisa koowaad la qaadan doona Madaxweynaha Somalia Maxamed C/llahi Farmaajo oo magaalada Nairobi kusii hormaray si muddo laba maalin ah uu ula shiro Madaxda Kenya oo casuumaad gaara u sameysay maalmaha Khamiista iyo Jimcaha, halka maalinta Sabtida ahna uu furmi doono shirka Urur gobaleedka IGAD.
Hailemariam Desalegn, ayaa waxaa dib usoo celinta xiriirka Somalia iyo Ethiopia ka caawin doona Madaxweynaha Kenya ee xilka kasii dagaaya oo qudhiisa aan xiriir wanaagsan kala dhexeyn Somalia, balse doonaaya inuu ka dhex shaqeeyo labada dal.
Hailemariam Desalegn, ayaa la kullanka Madaxweyne Farmaajo diirada ku saari doona 2 qodob oo kala ah:
1-In lasii ambaqaado xiriirka Somalia iyo Ethiopia iyadoo laga guulaayo Nabadeynta Somalia.
2-In Dowlada Ethiopia lasiiyo dhammaan tababarada Ciidamada Somalia, iyadoo la wareegi doonta Xarun lagu tababaro ciidamada oo dhawaan laga hirgaliyay duleedka Magaalada Baydhabo, isla markaana ciidamada doonaaya Tababarka lagala xiriiro Ethiopia.
Dowlada Ethiopia waxa ay garwaaqsan tahay in Madaxweynaha Somalia uu ku jiro qabweyni iyo naceybka Ethiopia, iyadoo taa ka duuleysaya ayaa ku hanweyntahay inay soo dhaweysato Madaxweynaha si ay usii ambaqaado ku tagrifalkeeda ku aadan Siyaasada Somalia iyo Carqaladeynta Amniga Somalia.
Dhinaca kale, Madaxweynaha Somalia Maxamed C/llahi Farmaajo ayaa qudhiisa ka meermeeraya in Dowladiisa ay buunbuuniso Siyaasada Ethiopia, inkastoo uu wadahadalkaasi u qaadan doono mid dhoola qosol ah.
Caasimada Online
Xafiiska Muqdisho
[email protected]