Laascaanood (Caasimada Online) – Sarkaal ka mid ah Maxaabiistii Somaliland ee dhowaan laga sii daayey Laascanood ayaa dhinaca Itoobiya kasoo galay magaalada Buuhoodle ee gobolka Togdheer.
Sarkaalkaan ayaa dib isugu dhiibay Maamulka SSC-Khaatumo oo maxbuus dagaal lagu qabtay uu ahaa labo sano.
Sida ay noo xaqiijiyeen masuuliyiin ka tirsan maamulka SSC-Khaatumo sarkaalkan ayaa sheegay in uu doorbidayo la noolaashaha dadka reer SSC.
Markii la wareystay wuxuu sheegay inuu aad u daneynayo deganaashaha magaaladii uu maxbuuska ku ahaa Laascanood.
Faahfaahin badan lagama helin sababta sarkaalkaan ku kaliftay inuu dib ugu laabto dadkii reer Laascaanood ee qabtay isagoo dagaalamaya.
Dadka qaar waxay noo sheegeen in sarkaalkaan uu Hargeysa kala kulmay tagoor bulsho, maadaama uu ahaa maxbuus dagaal oo muddo badan u xiraa SSC-Khaatumo.
Dad kale waxay noo sheegeen in xabsiga uu ku xanuunsaday intii uu ku jiray oo dhimirka ay wax ka gaareen, isla markaana uu iska jeclaaday inuu ku soo laabto deegaankii uu ku xiraa jiray.
SSC-Khaatumo oo weli ay u xiran yihiin in ka badan 400 oo maxbuus ayaa dhowaan si shuruud la’aan ah u sii deysay 25 maxbuus oo sarkaalkaan uu ku jiro.
Dowladda Soomaaliya oo garwadeen ka aheed sii deynta maxaabiistaas ayaa ka soo dejisay Muqdisho, kadibna u dirtay Hargeysa, halkaas oo si qarsoodi ah loogu soo dhaweeyey, Somaliland ayaa diiday in Warbaahinta la tuso maxaabiistaas markii ay ka degayeen Hargeysa.
