Muqdisho (Caasimada Online) – Madaxweynaha Soomaaliya Xasan Sheekh Maxamuud oo jeediyey khudbadiisa Ciidda Carrafo ayaa hambalyo iyo duco u diray dadka iyo dalka, isagoo khubadaan uga hadlay dhowr arrimood oo ay kamid yihiin siyaasadda, dowlad dhiska, doorashooyinka, dagaalka argagixisada iyo cafis uu mar kale u fidiyey dhalinyarada ka tirsan Khawaarijta, hadii ay isku soo dhiibaan dowladda.
Walaalayaal khawaarijtu waxay caqabad ku yihiin, dib u dhiska dalka iyo helitaanka adeegyada dadka Soomaaliyeed ay baahida u qabaan, waxay abuureen baahiyo badan oo Soomaaliya ay ka maarmi kartay, waxayna khatar weyn ku yihiin jiritaankeena,” ayuu yiri.
Madaxweynaha ayaa aad u naqdiyey ficillada argagixisada oo baneysatay dhiigga umadda Soomaaliyeed ee muslimiinta ah, wuxuuna farriin u diray dhallinyarada ka barbar dagaalanta kooxdaas.
“Maalintaan farxadda leh dhalinyarada Soomaaliyeed waxaa u furan inay ka soo laabtaan Khawaarijnimada oo ay cafis weydiistaan dadkooda iyo dowladooda,” ayuu yiri.
Madaxweyne Xasan Sheekh oo farriin u diray waalidiinta dhashay dhallinyarada ka tirsan argagixisada ayaa ka codsaday inay u caqli celiyaan wiilashooda la qalday, “u sheega inay weli heystaan fursad ay dib ugu soo noqon karaan dadkooda iyo deegaanadooda,” ayuu hadalkiisa ku sii daray.
Madaxweyne Xasan ayaa sheegay in maanta oo kale uu xabiibkeena Muxamed NNKH oo taagan banka Carafo uu muslimiinta ka xaaraantinimeeyey inay daadiyaan dhiigooda, balse kooxaha Khawaarijta ah ay taas ka dhega adeygeen.
Sidoo kale Maxaxweynaha ayaa sheegay in Khawaarijtu ay ku faanayaan inay dili doonaan qof kasta oo ka hor yimaada dulmiga ay wadaan, isagoo dadka Soomaaliyeed ku dhiirigeliyey inay dagaalamaan.
Madaxweynaha ayaa sheegay in Soomaaliya oo soo martay caqabado aad u badan ay ku sii socoto wadadii dowladnimada “dowladda Soomaaliyeed oo kaashaneysa shacabkeeda iyo saaxiibada caalamka waxay gaartay guulo taariikhi ah,” ayuu Madaxweynuhu yiri.
Madaxweynaha ayaa hambalyo, duco iyo amaan u diray ciidamada qaranka iyo kuwa macawiisleyda ah ee Khawaarijta la dagaalamaya, isagoo yiri “Geesiyaal waxaad sabab u tihiin in shacabkiinu ay nabad ku ciidaan.”
Hoos ka daawo