Jowhar (Caasimada Online) – Ciidamada Xoogga Dalka Soomaaliyeed oo ay garab siinayaan kuwa deegaanka ee loo yaqaan Macawiisleyda ayaa saacadihii u dambeeyay hawlgallo culus ka fulinayay aagga deegaanka Masaajid Cali Gaduud ee gobolka Shabeellaha Dhexe.
Hawl-galladan oo si gaar ah loogu beegsaday tuulooyinka hoos yimaada deegaanka Masaajid Cali Gaduud ayaa qayb ka ah dadaalka lagu xaqiijinayo nabadgelyada guud ee deegaankaasi, kaas oo ay ciidamada dhawaan kala wareegeen kooxda Al-Shabaab.
Ciidamo si wanaagsan u hubeysan ayaa weli ku sii qulqulaya tuulooyinka dhow ee hoostaga Masaajid Cali Gaduud, kuwaas oo weli ay joogaan maleeshiyaadka Al-Shabaab, sida ay warbaahinta u sheegeen dadka deegaanka.
Tuulooyinka ay ciidamadu hawl-gallada ka sameeyeen waxaa ka mid ah Towfiiq iyo tuulooyin kale oo muhiim ah, kuwaas oo horey ugu jiray gacanta Al-Shabaab. Hawl-galkan ayaa la tilmaamay inuu yahay mid qorsheysan oo lagu baacsanayo kooxaha argagixisada si looga saaro meelaha ay weli ku dhuumaaleysanayaan.
Wasaaradda Gaashaandhigga Soomaaliya ayaa caddeysay in hawl-galladan ay qayb ka yihiin olole ballaaran oo lagu xoojinayo dagaalka ka dhanka ah Al-Shabaab, gaar ahaan gobolka Shabeellaha Dhexe oo muddooyinkii u dambeeyay ay xoogag hubeysan ku sugnaayeen.
Dowladda Federaalka ayaa horay dhowr jeer u shaacisay in dagaalka ka dhanka ah Al-Shabaab uusan joogsan doonin illaa laga xaqiijiyo in kooxdu ay ka baxdo dhammaan deegaannada ay ka joogto dalka.
Hawl-gallada socda ayaa u muuqda kuwo is-daba joog ah, kuwaas oo lagu doonayo in lagu hubiyo in aysan jirin meel ay kooxda Al-Shabaab mar kale kaga soo dhuuman karto deegaanka Masaajid Cali Gaduud iyo nawaaxigeeda.