Garoowe (Caasimada Online) – Maamulka Puntland ayaa dekedda Garacad ee gobolka Mudug ku wareejinaya shirkad laga leeyahay Imaaraadka Carabta, taasoo qorsheyneysa maalgelin ballaaran oo dekeddaasi lagu sameeyo.
Madaxweynaha Puntland Saciid Cabdullaahi Deni oo xaqiijiyay arrintaan ayaa sheegay in muddo ay socdeen wada-hadallo farsamo oo la xiriiray wareejinta maamulka dekedda.
“Dekedda Garacad oo muhiim ahayd waxa muddaba socday wada-hadal dhinaca farsamada ah oo shirkadda Wadaagsin iyo shirkad laga leeyahay Imaaraadka Carabta oo doonaysa in ay la wareegto dekedda Garacad, si ay maalgelin ugu samayso dekedda,” ayuu yiri Saciid Deni.
Waxa uu intaas kusii daray “Hadda waxa la dhammeystiray dhamaan arrimihii farsamada, waxaana rajeynayaa in hirgelinta heshiiskaasi ay si deg-deg ah u bilaabato.”
Dekedda Garacad aya waxaa haatan gacanta ku haysa shirkad Soomaaliyeed oo lagu magacaabo Wadaagsan.
Sidoo kale, Madaxweynaha wuxuu sheegay in uu jiro qorshe lagu dhisayo waddo muhiim ah oo isku xiri doonta dekedda Garacad iyo kastamka Tuury-dibi ee degmada Galdogob, taasoo sahli doonta badeecadaha ganacsi ee loo raro Itoobiya.
Si kastaba, Imaaraadka ayaa hore gacanta ugu hayay dekedda magaalada Boosaaso, taas oo weli aysan dhammeystiran dhismaheeda.