Washington (Caasimada Online) — Rajadii Somaliland ka qabtay in maamulka madaxweyne Donald Trump uu aqoonsado ayaa wajahday dharbaaxo cusub, kaddib markii ilo ka tirsan Kongareeska Mareykanka ay sheegeen in aan la fileyn in Washington ay aqoonsato maamulka Hargeysa.
Ilo-wareeydo ka tirsan Kongareeska Mareykanka oo la hadlay warbaahinta Middle East Eye ayaa sheegay in aysan jirin wax muujinayay in Trump uu diyaar u yahay inuu aqoonsado Somaliland, inkastoo arrintaas ay muddooyinkii dambe si weyn u riixayeen xubno hore uga tirsanaa maamulladii Mareykanka.
Hadalkaas ayaa yimid maallmo kaddib warbixin ay Wasaaradda Arrimaha Dibadda Mareykanka u gudbisay Kongareeska, taas oo mar kale xaqiijisay in Washington ay aqoonsan tahay “madax-bannaanida iyo midnimada dhuleed” ee Jamhuuriyadda Federaalka Soomaaliya.
Warbixinta ayaa Somaliland ku qeexday inay ka tirsan tahay Soomaaliya, inkastoo ay sheegtay in Mareykanka uu sii wadi doono xiriirka uu la leeyahay maamulka Hargeysa, isla markaana uu eegayo fursado dheeraad ah oo iskaashi.
Arrintan ayaa loo arkaa farriin culus oo niyad-jab ku ah Hargeysa, halka Muqdisho ay u arki karto guul diblomaasiyadeed oo xoojineysa mowqifkeeda ku saabsan midnimada Soomaaliya.
Rajadii Trump oo sii yaraaneysa
Somaliland ayaa muddooyinkii dambe ku rajo weyneyd in Trump uu noqon karo madaxweynihii Mareykanka ee beddela siyaasadda Washington ee ku dhisan taageerada midnimada Soomaaliya.
Rajadaas waxaa sare u qaaday olole ay wadeen mas’uuliyiin hore oo Mareykan ah, gaar ahaan Tibor Nagy iyo J. Peter Pham, oo labaduba si cad u taageera in Somaliland la aqoonsado, iyo shirkado lacag badan ka qaata Imaaraadka iyo Somaliland,
Nagy, oo horey u ahaa kaaliyaha xoghayaha arrimaha dibadda Mareykanka ee Afrika, ayaa warbixinta cusub ku tilmaamay “ceeb”, isaga oo sheegay inay ahayd hadal xafiiseed aan nuxur lahayn, lagana dheehan karo cabsi laga qabo in laga careysiiyo Muqdisho.
Pham, oo isna hore uga tirsanaa dowladda Mareykanka, ayaa sheegay in Kongareeska uu Wasaaradda Arrimaha Dibadda ka dalbaday inay soo bandhigto meelaha lagu xoojin karo xiriirka Mareykanka iyo Somaliland, balse jawaabtii la helay ay noqotay laba bog oo keliya oo ku celcelinaya mowqifka Soomaaliya.
Falcelinta labadaas nin ayaa muujineysa sida warbixintan ay uga careysiisay xeryaha u ololeeya Somaliland ee Washington, gaar ahaan kuwa aaminsanaa in Trump uu u furnaan karo aqoonsi rasmi ah.
Muqdisho oo heshay farriin ay sugeysay
Dowladda Soomaaliya ayaa muddo dheer ka digeysay in dalalka shisheeye ay Somaliland ula macaamilaan sidii dal madax-bannaan, iyadoo ku adkeysaneysa in arrintaasi ay dhaawaceyso madax-bannaanida iyo midnimada dhuleed ee Soomaaliya.
Warbixinta Mareykanka ayaa si cad u muujisay in Washington ay diyaar u tahay xiriir amni, ganacsi iyo maalgashi oo ay la yeelato Somaliland, balse aanay taasi ka dhigneyn aqoonsi.
Tani waxay Hargeysa u reebeysaa waddo kooban: in lala macaamilo, balse aan loo aqoonsan dal ka madax-bannaan Soomaaliya.
Somaliland ayaa ku dhawaaqday inay ka go’day Soomaaliya sanadkii 1991, waxayna muddo ka badan soddon sano lahayd maamul u gaar ah, doorashooyin iyo hay’ado gaar ah. Si kastaba, weli ma aysan helin aqoonsi caalami ah oo ballaaran.
Israel ayaa noqotay dalkii ugu horreeyay ee si rasmi ah u aqoonsada Somaliland bishii December ee sanadkii hore, taas oo sare u qaaday rajada Hargeysa ee ah in dalal kale ay raaci doonaan.
Laakiin warbixinta Washington iyo hadalka ilaha Kongareeska ayaa muujinaya in Mareykanka uusan hadda diyaar u ahayn inuu qaado tallaabo la mid ah tan Israel.
Berbera iyo danaha Mareykanka
Inkasta oo warbixintu ay meesha ka saartay rajadii degdegga ahayd ee aqoonsiga, haddana waxay si cad u muujisay in Somaliland ay weli muhiim u tahay danaha istaraatiijiga ah ee Mareykanka.
Wasaaradda Arrimaha Dibadda Mareykanka ayaa sheegtay in goobta Somaliland ay ku taallo, gaar ahaan u dhowaanshaha Yemen iyo marin-biyoodka Bab al-Mandab, ay ka dhigeyso meel muhiim u ah amniga Badda Cas, Gacanka Cadmeed iyo Badweynta Hindiya.
Warbixinta ayaa sheegtay in Somaliland ay noqon karto saaxiib muhiim ah oo dhinaca amniga ah, gaar ahaan ilaalinta isu socodka maraakiibta ganacsiga iyo kuwa milatari.
Somaliland ayaa Mareykanka u bandhigtay fursado la xiriira macdan, kaabayaal dhaqaale, ganacsi iyo amni. Saraakiisha Hargeysa ayaa sheegay in dhulkooda laga heli karo lithium, coltan iyo macdan kale oo muhiim ah.
Si kastaba, warbixinta Mareykanka ayaa sheegtay in khilaafka maqaamka Somaliland, xaaladda amni ee gobolka iyo diidmada Hargeysa ee wada-shaqeynta hay’adaha qaranka Soomaaliya ay caqabad ku yihiin maalgashiga, bangiyada iyo ganacsiga.