Garowe (Caasimada Online) – Miino nooca lagu farsameeyo Somalia ee lagu qarxiyo Taleefanka Mobile-ka ayaa gelinkii danbe ee Jimcihii (23-08-2013) waxaa lasoo dhigay agagaarka guriga Madaxweynaha Maamulka Puntland C/raxmaan Faroole ee Garoowe, taasoo ay fashiliyeen ciidamada amaanka Garoowe.
Dadka deegaanka ayaa ciidamada amaanka ku wargeliyeen in Miino la dhigay agagaarka guriga Faroole, waxaana halkaasi soo gaaray ciidamo Boolis ah oo isku gadaamay xaafada 1-da Agoosto, iyadoo kadibna ciidamadu qarxiyeen miinadaasi.
Howlgall mudo saacado qaatay ayey ciidamada Booliska ka fuliyeen xaafada lasoo dhigay, iyadoo howlgalkaasi aysan jirin cid lagu soo qabtay.
Taliyaha qeybta Booliska ee gobalka Nugaal C/raxmaan Xaaji Abshir ayaa ka warbixiyay Miinadaasi lagu aasay xaafada uu degan yahay Faroole isagoo sheegay in kooxaha soo dhigay qorshahoodu ahaa iney ku waxyeeleeyaan dadka shacabka.
Arrintan ayaa waxaa walaac ka muujiyey dadka deegaanka oo wax qatar ah ku tilmaamay in awood loo yeeshay in miino lagu aaso agagaarka hoyga Faroole.
Isha: Warfaafiye.com