Addis Ababa (Caasimada Online)-Dowlada Ethiopia ayaa magaalada Addis Ababa ee xarunta dalkaasi uga yeertay xubnaha ugu sareeya Xisbiga Dimuqraadiga Shacabka Soomaalida Ethiopia.
Dowlada ayaa la sheegay in u yeerida ay ula gol leedahay talo jeedin maadaama Madaxweynihii hore ee DDSI Cabdi Cumar uu ku jiro xabsi guri ku yaalla magaalada Addis Ababa.
Xubnahaani oo la sheegay in tirro ahaan ay iminka gaarayan ilaa Sodon xubnood ayaa waxaan kamid aheyn 3 Xubnood oo iyagu aan looga maari Karin ku sugnaanshaha magaalada Jigjiga kuwaa oo si KMG ah usii haya maamulka.
Xisbigan oo ah midka ka arrimiya deegaanka Soomaalida ayaa maalmihii u dambeeyay ka biyo diidanaa aadista magaalada Addis Ababa oo looga yeeray asbuuci tagay.
Uyeerista xubnahaani timid ka dib markii Militeriga Ethiopia ay la tageen Madaxweynihii hore ee deegaanka oo ilaa hadda lagu hayo magaalada Addis Ababa.
Qorshaha u yeerida xubnaha ayaa waxaa leh Wasiirka arrimaha dibadda Ethiopia oo hirgalinaaya amarka kasoo baxay Xafiiska Ra’isul wasaare Abiy Axmed oo isagu lahaa fekerka loogu yeeray xubnaha.
Warar hoose ayaa sheegaya in xubnahaasi la faray inay tallo siiyaan Madaxweynihii xilka laga tuuray Cabdi Cumar, iyadoo tallo diidmo kadib la filaayo in laga gaaro go’aan.
Sidoo kale, xaaladda magaalada Jigjiga ayaa iminka ah mid dagan waxaana la filayaa in ay noloshu si deedii tartiib tartiib ugu soo noqoto maadaama la dajiyay shacabkii kacdoonka sameynaayay.
Si kastaba ha ahaatee, waxaan la saadaalin Karin waxa kasoo bixi doona kulanka magaalada Addis Ababa uga socda dowlada Federaalka iyo xubnaha Xisbiga Dimuqraadiga Shacabka Soomaalida Ethiopia ee hadda ku sugan Addis.
Caasimada Online
Xafiiska Addis Ababa
Caasimada@live.com
