Jowhar (Caasimada Online) – Wararka naga soo gaaraya Shabeellaha Dhexe ayaa sheegaya in saacadihii ugu dambeeyay maleeshiyaada Al-Shabaab ay la wareegeen duleedka deegaanka Nuur Dugle ee gobolkaasi, kadib dagaal ay la galeen ciidanka Macawiisleyda.
Maleeshiyada ayaa qabsatay Ceelka Cali Salaad oo dhanka qorrax u dhac ka jira magaalada sida u xaqiijiyay Taliyaha Ciidanka Macawiisleyda ee deegaanka Nuur Dugle.
Taliyaha oo la hadlay Idaacadda Risaala aaa sheegay in haatan iyaga iyo ciidamda dowladda ay ku sugan yihiin gudaha Nuur Dugle, balse weli Al-Shabaab ay haystaan Ceelka Cali Salaad oo ay shalay la wareegeen, kaas oo muhiim u ah xoolaha dhaqatada deegaanka.
“Meesha cadowga weli waa haystaan waa sidii ay shalay u qabsadeen annagana waa isku muuqanaa oo hadda kalama dheerin, dowladdana waa timid, ma rajeyneyso inay sii haystaan” ayuu yiri Taliyaha Ciidamada Macawiisleyda ee deegaanka Nuur Dugle.
Sidoo kale, wuxuu intaasi ku daray in xalay la duqeeyay Al-Shabaabka soo galay halkaasi, isla markaana khasaare culus la gaarsiiyay, sida uu hadalka u dhigay.
“Xalay nimanka hoos waa laga galay, korna diyaaradda ayaa ka duqeysay kolba meesha jab ayaa kusoo gaaray nimanka” ayuu mar kale yiri taliyuhu.
Xaaladda ayaa haatan mid kacsan, waxaana dhaq-dhaqaaqyo duleedka Nuur Dugle ka wada ciidanka dowladda iyo kuwa Macawiisleyda oo ka hortagaya Khawaarijta.
Al-Shabaab ayaa horay u qabsatay deegaanno iyo magaalooyin muhiim ah oo ay kamid tahay demada Aadan Yabaal, oo illaa iyo hadda ay si buuxda gacanta ugu hayso kooxda.