Muqdisho (Caasimada Online) – Kooxda Al-Shabaab oo muddooyinkii dambe wajaheysay culeys dhanka dhaqaalaha ah kadib markii ay dowladda federaalka Soomaaliya ay dagaal xooggan la gashay, ayaa haddana waxay dhawaan kooxda billowday qorshe cusub oo lacag ku aruursaneyso.
Kooxda ayaa waxay saldhig ay ku aruursato lacagaha baadda ah ka sameysatay deegaan aan aad uga fogeyn Muqdisho, halkaasi oo ay maalmihii dambe ugu yeertay maamullada dugsiyada gaarka loo leeyahay iyo qaar kamid ah maamullada Jaamacadaha, sida ay ogaatay Caasimada Online.
Deegaankan ayaa lagu magacaaba Galka Saalimow oo u dhaxeeya Ceelasha iyo deegaanka Jaziira ee ku yaalla duleedka magaalada Muqdisho, waana goobta ay toddobaadyadii dambe ugu yeertay dadka ay lacagaha baadda ah ka rabaan.
Xogta ay heshay Caasimada Online, ayaa sheegaysa in maamulayaasha iskuullada gobolka Banaadir ee kooxda ugu yeertay ay iskuul kasta maamulihiisa weydiisatay lacag $300 ah, taasi oo kooxda kusoo rogtay in bil walba bixiyaan.
Lacagtaan ay kooxda kusoo rogtay maamullada iskuullada gobolka Banaadir ayaa la faray inay bil walba 30-keeda bixiyaan, taasi oo ay ku sheegeen inay tahay canshuur ama waxay ugu yeeraan Zakawaad, ay ka rabaan iskuullada gobolka ee dugsiyada hoose/dhexe iyo sarre.
Qorshaha lacag aruursiga ee ay billowday kooxda ayaa sida xogta ku helayno ku koobneyn gobolka Banaadir, waxaana jira maamulo kale oo sidan oo kale ka bilaabeen aruursiga lacagaha baadda ah.
Magaalooyin ay kamid yihiin Baydhabo, Jowhar, Kismaayo, Beledweyne iyo magaalooyin kale oo ka tirsan maamulka Galmudug ayay xogta sheegaysa in kooxda ay ka billowday inay bahda waxbarashada ka qaado lacagaha ay ku sheegtay Zakawaadka.
Majiro illaa hadda wax war ah oo kasoo baxay hay’adaha amaanka ee dowladda federaalka Soomaaliya oo ku aadan qorshaha cusub ee kooxda ku aruursaneyso lacagaha.
Tan iyo markii uu billowday dagaalka dhowrka weji leh ee kooxda Al-Shabaa, waa markii ugu xooggana ee kooxda ay lacag ka aruurineyso bahda waxbarashada, gaar ahaan hay’adaha sida gaarka loo leeyahay ee iskuullada.
Dowladda federaalka Soomaaliya ayaa horey u xirtay akoono iyo lambaro ay kooxda u isticmaali jirtay lacagaha baada ah ee ka qaado umadda Soomaaliyeed, waxaana weli muuqata in kooxda ay la imaneyso xeelado cusub oo lacag ku aruursaneyso, xilli ay socdaan dadaalo lagu wiiqayo awooda dhaqaale ee kooxda.
Si kastaba, arrimahan ayaa imanaya xilli uu hakad galay dagaalkii ka dhanka ahaa kooxda Al-Shabaab, oo aysan dowladda muddo qaadin wax howl-gal ah oo muuqda, inkasta oo ay dowladda sheegtay inuu dhawaan billaaban doono wejiga labaad ee dagaalka.
