Nairobi (Caasimada Online) – Beesha Isaaq ayaa si weyn uga cabatay takoor ay sheegtay in ay kala kulmeyso dowladda Kenya, iyagoo sheegay in aan beeshaasi wax metelaad ah ku lahayn hay’adaha dowladda.
Beesha ayaa arrintan ku soo bandhigtay shir ay ku yeesheen magaalada Nairobi, halkaas oo ay kaga codsadeen dowladda Madaxweyne William Ruto in ay wax ka qabato cabashadooda.
Qaar ka mid ah masuuliyiintii shirka ka hadlay ayaa sheegay in beesha Isaaq muddo dheer ka mid ahayd bulshada Soomaaliyeed ee ku dhaqan Kenya, balse aanay helin wax metelaad ah oo muuqda.
Sidoo kale waxay codsadeen in dowladda Kenya ay ku darto liiska beelaha la aqoonsan yahay ee fursadaha helaya, si loola simo beelaha kale ee Soomaaliyeed.
Dhowr qabiil oo Soomaaliyeed ayaa si joogto ah xilal sare uga hela dowladda Kenya, halka beesha Isaaq aanay weligeed wax xil ah ka qaban dowladda Kenya.
Beesha Isaaq waxay ku baaqday in la siiyo aqoonsiga iyo xuquuqaha kale ee ay beelaha kale heleen, si loo helo cadaalad bulsho iyo mid siyaasadeedba.
Si kastaba, arrintan ayay beeshu ku tilmaantay mid xaq-darro ah oo u baahan in si deg-deg ah wax looga qabto si beesha loo siiyo xuquuq la mid ah mida beelaha kale.