Washington (Caasimada Online) – Hay’adaha sirdoonka Mareykanka ayaa baaraya suurta-galnimada in Ruushka uu Iran ka caawiyay xogta bartilmaameedyada ama farsamada diyaaradaha aan duuliyaha lahayn ee loo adeegsaday weerarro lagu qaaday xarumo ay CIA-du ku leedahay dalalka Khaliijka, sida ay sheegeen afar qof oo xog-ogaal u ah qiimeynta sirdoonka Mareykanka.
Ilaha, oo codsaday inaan magacyadooda la shaacin maadaama ay ka hadlayeen arrimo xasaasi ah oo amniga qaranka la xiriira, ayaa sheegay in saraakiisha sirdoonka Mareykanka aysan weli gaarin gunaanad rasmi ah oo ku saabsan kaalinta Ruushka.
Hase yeeshee, saxnaanta iyo waxtarka weerarrada, iyo sidoo kale taageerada farsamo ee Moscow ay muddooyinkii dambe siisay Tehran, ayaa sare u qaaday shakiga ah in Iran ay heshay caawimaad dibadeed.
Warbaahinta caalamiga ah ayaa horay u sheegtay, saraakiil Mareykan ahna way xaqiijiyeen, in Ruushka uu Iran siiyay xog iyo taageero kale oo ay u adeegsatay weerarrada ka dhanka ah bartilmaameedyada Mareykanka ee gobolka Khaliijka.
Si kastaba, baaritaanka gaarka ah ee ku saabsan in Moscow ay gacan ka geysatay weerarrada lagu qaaday xarumaha CIA-da ayaan horey loo shaacin.
Xarumaha CIA-da ee la beegsaday
Ugu yaraan laba xarumood oo CIA-da ay isticmaasho ayaa la weeraray bishii Maarso, sida ay horay u sheegeen Reuters iyo warbaahin kale.
Mid ka mid ah xarumahaas wuxuu ahaa saldhigga CIA-da ee Sacuudi Carabiya, kaas oo ku dhex yaalla safaaradda Mareykanka ee magaalada Riyadh. Xarun kale ayaa ku taallay bariga dalka Ciraaq.
Qaar ka mid ah ilaha ayaa sheegay in xarumo kale oo CIA-da ah sidoo kale la weeraray, balse waxay ka gaabsadeen inay bixiyaan faahfaahin ku saabsan goobahooda ama tiradooda.
Mid ka mid ah ilaha ayaa sheegay in tirada xarumaha la beegsaday ay ahayd “in ka badan hal, balse ka yar 12”, halka il kale uu sheegay in dhowr xarumood la weeraray.
Xarumaha CIA-da ee dibadda waxaa ka mid ah xafiisyada ugu muhiimsan ee hay’addu ku leedahay dalalka kala duwan, kuwaas oo inta badan ku dhex yaalla safaaradaha Mareykanka, loona yaqaan “stations”.
Hay’addu waxay sidoo kale leedahay xafiisyo qarsoodi ah, guryo ammaan ah, xarumo saadka iyo goobo lagu fuliyo howlgallada dabagalka iyo sirdoonka. Goobaha xarumahaas waxaa loo ilaaliyaa si aad u adag.
Xog sirdoon oo farta ku fiiqday Ruushka
Qoraal gudaha ah oo ay diyaarisay hay’ad sirdoon oo reer Galbeed ah ayaa lagu sheegay in Ruushka ay u badan tahay inuu kaalin ka qaatay bartilmaameedsiga xarumaha CIA-da ee gobolka.
Sarkaal ka tirsan gobolka oo arkay qoraalkaas ayaa sheegay in qiimeynta sirdoonku ay farta ku fiiqeyso kaalinta Moscow, balse wuxuu codsaday inaan la shaacin hay’adda sida gaarka ah u diyaarisay warbixinta.
Laba sarkaal oo reer Galbeed ah oo ku sugan Khaliijka, kuwaas oo la socodsiiyay warbixinnada sirdoonka, ayaa sheegay in weerarkii Sacuudi Carabiya loo adeegsaday laba diyaaradood oo nooca Shahed ah oo Iran leedahay, kuwaas oo la rumeysan yahay in Ruushku farsamo ahaan horumariyay.
Sida ay saraakiishu sheegeen, diyaaraddii koowaad ayaa dalool ka sameysay qeyb nugul oo ka mid ah gidaarka bannaanka ee safaaradda, halka diyaaraddii labaad ay daloolkaas ka dhex gudubtay ka hor inta aysan qarxin.
Weerarka laguma soo warramin inuu sababay wax dhimasho ama dhaawac ah.
Haddii la xaqiijiyo in Ruushka uu si gaar ah uga qeyb qaatay bartilmaameedsiga xarumaha CIA-da, waxay taasi muujin kartaa in Moscow ay diyaar u tahay inay sare u qaaddo dadaalladeeda lagu carqaladeynayo howlgallada Mareykanka ee gobolka.
Shakiga laga qabo in Ruushka uu Iran siinayo xogta bartilmaameedyada ayaa sii xoogaystay kaddib weerarro lagu qaaday saldhig Mareykanku ku leeyahay Jordan, halkaas oo gantaallo ballistic ah lagu beegsaday xeryo ay ciidamada ku sugnaayeen, laguna dilay laba askari.
Aqalka Cad ayaa codsi faallo ah u gudbiyay CIA-da, balse hay’addu way ka gaabsatay inay ka hadasho arrinta.
Sidoo kale, wakiillada Iran ee Qaramada Midoobay, Wasaaradda Difaaca Ruushka iyo dowladda Sacuudi Carabiya kama jawaabin codsiyo faallo ah.
Teknoolajiyada Ruushka oo gaartay Iran
Saraakiisha reer Galbeedka ayaa sheegay in Ruushka uu Iran ka caawiyay sidii ay u horumarin lahayd awoodda diyaaradaha Shahed ee lagu gaari karo laguna beegsan karo bartilmaameedyada.
Il kale ayaa sheegay in Moscow ay Tehran siisay nidaam hagidda dayax-gacmeedka ku shaqeeya oo lagu magacaabo Kometa-M, kaas oo loo adeegsaday in lagu kordhiyo saxnaanta diyaaradaha Shahed-136.
Khubarada ayaa sheegaya in nidaamka Kometa-M uu ka saxnaan badan yahay nidaamyada ay Iran soo saarto, sidoo kalena ay adag tahay in la carqaladeeyo ama la marin-habaabiyo.
Wargeyska Wall Street Journal ayaa bishii Maarso markii ugu horreysay sheegay in Ruushku uu nidaamka Kometa-M siiyay Iran. Kremlin-ka ayaa markaas beeniyay warka, isaga oo ku tilmaamay “war been abuur ah”.
Baarayaasha sirdoonka Mareykanka ayaa hadda isku dayaya inay ogaadaan in Iran ay xog bartilmaameed oo Ruushku bixiyay u adeegsatay weerarkii safaaradda Mareykanka ee Riyadh.
Si kastaba, weli waxaa jira shaki ku saabsan in qeybta CIA-da si ula kac ah loo beegsaday.
Qaar ka mid ah ilaha ayaa sheegay inay suurtagal tahay in Iran ay weerarka ula jeedday guud ahaan safaaradda Mareykanka, balse diyaaradaha ay si kadis ah ugu dhaceen qeybta ay CIA-du isticmaasho.
Hase yeeshee, falanqeeyayaasha qaar ayaa rumeysan in dalal yar oo aan Ruushka ahayn ay awood iyo danba u leeyihiin inay helaan xog sidaas u xasaasi ah, kaddibna u adeegsadaan weerarro ka dhan ah Mareykanka.
Daniel Hoffman, oo horay madax uga soo noqday xarun CIA-da ah isla markaana ka tirsanaa saraakiisha howlgallada qarsoon, ayaa sheegay in aysan la yaab noqon doonin haddii Moscow ay Tehran ka caawisay beegsiga xarumaha CIA-da.
“Waxay wadaagaan dan ah inay yareeyaan ama gebi ahaanba meesha ka saaraan saameynta Mareykanka ee deegaannada ay iyagu u arkaan inay yihiin goobahooda saameynta,” ayuu yiri Hoffman.