Shaki kuma jiro in ay shalay Soomaalidu is wada dishay oo kala qaxday,is wada xumeysay oo hadana is nacday, iyadoo badankoodu aaneey ogeyn sababta dadkii is jeclaa oo wada daganaa waqtiga dheer ey sidaa u sameynayaan ama isku gumeynayaan, qaar bayse la fogaatay waagaa cuqdadda laga dhex abuuray bulshada oo waxey rumeysteen in sidii loo dirirayay waligeed loo coleysnaan doono, kuwana inta badan waa ka fogaadeen wixii fool xuma ahaa ee dalka ka dhacayay,oo waxaaba la oran karaa taa badalkeeda wey ka xumaayeen wixii hareerahooda lagu falayay waxna kama qaban karin.
Maantana dib beey isugu soo laabatay Iyadoo aaney jirin meel si dhab ah looga wada hishiisiiyay wixii kala gaaray ama cid u kala balan qaaday in ay daawo u heshay xumaantoodii oo aaney dib dambe u soo laaban doonin, iminka wey wada ganacsadaan oo is dhexqaadaan, dhibka wey isaga damqadaan,weyna is gargaaraan, sidii bey isu guursadaan oo ubad isugu dhalaan,amaba u wada sheekeystaan una kaftamaan, dabcan waxabaa jira si kastooy isu dishay ama u kala hayaantay aan ogoleyn kala maqnaanshahooda.
Waxaaba la oran karaa waqtigaan Xig yar baa ka soo laabtay damiirkii iyo Dadnimadii ay dharaarta cad ka dheelmatay bulshadaani kuna xambaartay sameynta wax kasta oo aan wanaagsaneyn, waase goor ay dhaceen wixii dhici lahaa goorta la soo baraarugay oo la is weydiiyay waxa ay Soomaalidu isku qoonsatay iskuna leysay ama ku kala tagtay.
Wey fiicnaan laheyd in maalmo hore sidaa loo fikiro oo la is weydiiyo Su’aalo badan,balse aan u daayo Qadarta iyo in ay si qunyar qunyar ah dadku u soo fahmayeen waxa isku diray ama kala geeyay in ay tahay oo qura SIYAASADDA, oo nin waliba ama Koox waliba ku dooneysay si ka duwan sida ay ku doonayeen kuwii kaga horeeyay, QABIIL, AWOOD CIIDAN, ISBAHEYSI SIYAASADEED, DIIN, DANO SHISHEEYE, MAAMUL XAAFADEED, iyo weliba wajiya kaloo badan oo midba maalintiisa lagu soo muraadsaday. ogoowna intaas oo isku day marna looma daneyneyn shacabka ee waxaa had walba la iska ciideynayay Cadka la isku heystay, marka been bey aheyd wixii marar badan lagu howlgaliyay Beel hebel ama Koox hebel looguna dhiibay hubka si ay Reer hebel ama Koox hebel uga doontaan xaqoodda.
Hadiise , wax-xoogaa laga soo gudbay ama garaad ahaan laga koray wixii awal la rumeysnaa ama la isku heystay,weli waxaa jira qatara kale oo u muuqanaya kuwa ay waqtigaan bulsha badani u heelan tahay ama aaminsan tahay in lagu kala nabad gali karo, waa Sun nooga timid dalalka dariska ah oo mar hore lagu talaalay Gobolo dhowr ah kuwa kalena hada lagu qalqaalinyo in lagu mudo si ay Madaxweynayaal uga noqdaan kuwooda ugu xukunka jecel misana aan kala jecleyn danta guud iyo wadajirka Umadda.
Kuwaa i oran doona “oo ma waxaad diidan tahay in Qabiil walba uu gobolkiisa ama deegaankiisa u sameysto Maamul iyo Madaxweyne ”, HAA, waa midaas midda aan diidanahay waayoo nidaamkaa Goboleysigaa ma aha wax aan Anagu dooranaye waa wax naloo dooray oo aynaan aqoon ahaanba wax badan ka fahamsaneyn waana mid dib danbe noo dhaxal siin kara dagaalo cusub oo mar kale ka dilaaca dagalo iminka nabdoon waana hubanti hadii lagu sii adkeysto in ay furmi doonaan albaabo ay ku qoran yihiin DAGAALADII GOBOLEYSIGA AMA DAGAALADII MURAN DHULEEDKA.
Hase yeeshee,Soomaalidu waa Ilama Adeer, waa Wiil iyo Abtigii, Gabar iyo Sodohdeed.waana Xidid iyo Xigaalo kalamana maarmaan, Rajada iminka iiga muuqata shacabkana,Waan hubaa si kastoo loo kala qobqobo in uu weli nool yahay dareenkii wada dhalashoo dhiiranaan jiray,Waan hubaa markeey dhanaan tahay iney dhexda isku xiran doonaan, Waan hubaa hadeey is mutaan in eysan kala dhuuman doonin, Waan hubaa marka uu dhamaado xiisaha Madaxtinimo iyo Cadka ay isku hayaan in ay Caanaha isugu jira wada dhami doonaan insha Alaah.
FG:- TANI WAA ARAGTIDETDA. DHAMAAD//=
W/Q:- C/qaadir M,Faarax {Dulyar}
Miqdisho/Soomaaliya
Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online.
Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada caasimada@live.com Mahadsanid
