Muqdisho (Caasimada Online) – Faahfaahino dheeraad ah ayaa waxaa laga helayaa khasaaraha ka dhashay roobab daadad xoogan watay oo maanta ka da’ay gudaha magaalada Muqdisho ee caasimada Soomaaliya, kuwaas oo saameyn ku yeeshay shacabka.
Roobabkan oo watay biyo xoogleh ayaa khasaare u badan burbur ka gaystay xaafado ka tirsan caasimada, sida ay muujinayaan muuqaallo ay soo duubtay warbaahinta.
Meelaha sida weyn dhibaatada looga dareemayo waxaa kamid ah waddooyinka halbowlaha ah ee Muqdisho, kuwaas oo qaarkood biyuhu hakad geliyeen isku socdka gaadiidka.
Sidoo kale waxaa la arkayay meelaha qaar dad ay biyuhu qaateen, balse gurmad loo fidiyay kadibna sidaas lagu soo bad-baadiyay.
Qaar kamid ah dadweynaha ku ganacsada hareeraha waddada isku xirta Bakaaraha iyo Dabka ayaa sheegay inay dhibaatooyin kasoo gaareen roobabkii ka da’ay halkaasi.
Dadkan ayaa sheegay in ganacsigooda uu burburay, isla-markaana ay biyuhu qaadeen alaabtii ay iibinayeen, balse iyagu lasoo bad-baadiyay.
“Hadda annaga waa ka bad-baadnay, laakiin hantidii ayay biyaha naga qaateen annagoo roob caadi ah u maleyneyno ayay nasoo galeen biyo xoogleh oo na qaaday” ayay tiri gabar kamid ah ganacsatada ku sugneyd waddada isku xirta isgoysyada Dabka iyo Bakaaraha.
Waxaa kale oo ay sii raacisay “Roob ma dhihi karno kan musiibo waayay dad ay qaadeen xittaa waa lasoo bad-baadiyay”.
Khasaaraha intaas kuma eka, waxaana la arkayay mootooyin nooca Bajaajta ah oo ay biyuhu la tageen, kadib markii darawalladu xakameyn waayeen sidaasna ay kula rogmatay.
Soomaaliya ayaa waxaa haatan ka jira xaalado adag oo ka dhalaty fataahadaha iyo daadad xoogan oo ku dhuftay magaalooyinka qaar ee ku yaalla gudah dalka.
