Daawo: Xildhibaanada Xawaadle oo soo saaray war yaab leh kadib tallaabo uu qaaday Guudlaawe

Beledweyne (Caasimada Online) – Qaar ka mid ah xildhibaanada baarlamaanka HirShabeelle ku metela gobolka Hiiraan, gaar ahaan xildhibaanada ka soo jeeda beesha Xawaadle ayaa eedeymo culus u jeediyey Cali Guudlaawe.

Xildhibaanadaas oo maanta shir jaraa’id ku qabtay magaalada Beledweyne ayaa sheegay in markii ay Cali Guudlaawe kala hadleen tabashada beeshoodu ay ka qabto maamulka uu ka jartay gunadii xildhibaanimada ay ku heli jireen.

“Markii tabashada dadkeena la dhageysa waayey, ayaan weydiinay madaxweynaha sababta loo dhageysa la’yahay dadkeena, kadibna wuxuu gunadii ka jartay shan ka mid ah Xildhibaanada Xawaadle,” ayuu yiri mid ka mid ah xubnaha hadlay.

Xildhibaanadaan ayaa Cali Guudlaawe ku eedeeyey inuu kala jecleystay beesha uu ka dhashay ee Abgaal iyo beesha Xawaadle, “Liiska wasaaradda waxbarashada HirShabeelle waxaa lagu soo qoray in Masaajid-Caligaduud ay degmo tahay oo Moqokori aysan degmo aheyn,” ayuu yiri mid ka mid ah xildhibaanadii hadlay.

Xildhibaanadaan oo hadda ku sugan Hiiraan ayaa sheegay in Cali Guudlaawe uu raadinayo ‘xaalad abuur’ iyagoo sheegay in dadkooda ay dhex-joogaan, isla markaana aysan wax saameyn ah ku yeela doonin guno laga jartay.

“Dadkeena ayaan ku dareen nahay, ayaga ayaan maamulkaas ku meteleynay, meel aan ayaga laga rebina, anaga nalagama rabo, Cali Guudlaawe waxaan u sheegeynaa in madaxtinimadii uu ka doortay Kaaba-qabiilnimo,” ayuu yiri xildhibaan hadlay.

Sidoo kale Xildhibaanada HirShabeelle ku metela beesha Xawaadle ayaa wasaaradda maaliyadda dowladda federaalka ka socdsaday in lacagaha lagu kabo miisaaniyadda maamulkaas aan lagu darin qoondada gobolka Hiiraan, maadaama ay cabasho ka yihiin hoggaanka maamulka.

“Intii dagaalka lagu jiray waxaa la helay lacag dhan $4 miliyan oo dollar, cali Guudlaawe ayaa shakhsiyan u isticmaalay, lacagtaas qoryo ayuu kala baxay, xarunta baarlamaanka ee Jowhar waxaa u dhex yaalla qori Suug ah oo lacagtaas uu kala soo baxay,” ayuu hadalkiisa ku sii daray xildhibaanka hadlay.

Xildhibaan kale oo goobtaas ka hadlay ayaa Madaxweyne Cali Guudlaawe ku eedeeyey inuu caqabad ku yahay dagaalka Al-Shabaab, “Gaadiid dagaal waa leeyahay, laakiin waligood Shabaab xabad kuma ridin, waxaanba is dhahnay waxaa ka dhaxeeya cilaaqaad,” ayuu yiri.

Hoos ka daawo