Qarax xoogan oo ka dhacay magaalada Muqdisho

By Guuleed Muuse

Muqdisho (Caasimada Online) – Qarax xoogan ayaa goordhowey ka dhacay magaalada Muqdisho, gaar ahaan maqaaxi lagu shaaho oo ku taalla isgoyska Jubba ee u dhaxeeya degmooyinka Boondheere iyo Shangaani.

Sida ay ogaatay Caasimada Online, Qaraxa ayaa waxaa fuliyay qof xiran suunka qaraxa loo adeegsado, waxaana ka dhashay dhimasho iyo dhaawac.

Goobta uu qaraxa ka dhacay ayaa waxaa ku sugnaa dad badan, maadama ay aheyd maqaayad ku taalla isgoys mashquul badan, sida ay dad goobjoog ah u sheegen Caasimada Online.

Ciidamada amaanka ayaa gaaray goobta qaraxa uu ka dhacay, waxayna xireen isku socodkii isgoyska, ayaga oo halkaas ka bilaabay baaris horudhac ah oo la xiriirta qaraxa.

Ilaa hadda si rasmi ah looma oga xadiga khasaaraha marka laga soo tago inuu sababay dhimasho iyo dhaawac qaraxaas.

Wixii faah-faahina isha ku hay Caasimada Online