Mandera (Caasimada Online) – Warar kala duwan ayaa kasoo baxaya dagaal culus oo maanta ka dhacay deegaanno hoostaga magaalada Mandera ee Gobolka Waqooyi Bari, kaas oo u dhexeeyay maleeshiyaad ka tirsan Al-Shabaab iyo ciidamada dowladda Kenya.
Dagaalka oo laba goobood ka kala dhacay ayaa yimid, kadib markii maleeshiyaadka Al-Shabaab ay weerareen fariisimo ay ciidamada Kenya ku leeyihiin duleedka magaalada, waxaana kadib xigay dagaal toos ah.
Weerarka koowaad ayay maleeshiyaadka Al-Shabaab ku qaadeen deegaanka lagu magacaabo Fino, iyaga oo beegsaday saldhig ciidamada Kenya ku leeyihiin halkaasi, waxaana kadib la maqlay rasaas ay is waydaarsanayaan labada dhinac.
Sidoo kale, weerarka labaad ayaa ka dhacay deegaanka Carabiya oo isna hoostaga Mandera, halkaas oo ay beegsadeen maleeshiyaad kale oo ka tirsan Al-Shabaab, sida ay innoo xaqiijiyeen ilo deegaanka ah.
Illaa iyo hadda ma cadda khasaaraha rasmiga ah ee ka dhashay weerarradan iyo dagaallada xigay, maadaama goobaha la beegsaday ay yihiin saldhigyo ay dagan yihiin ciidamada dalka Kenya.
Dhanka kale, ma jiro wax hadal ah oo kasoo baxay saraakiisha laamaha ammaanka Kenya oo ku aadan weerarradaas iyo haddii ay jiraan howlgallo ay sameeyeen ciidamada kadib dagaalka.
Xaaladda ayaa weli kacsan, waxaana haatan dhaq-dhaqaaqyo laga dareemayaa qaybo badan oo kamid ah xadka dheer ee ay wadaagaan dalalka Soomaaliya iyo Kenya, halkaas oo ay dhuumaaleysi uga gudbaan xubnaha Shabaab ee weerarada ka fuliya Gobolka Waqooyi Bari.
Inta badan maleeshiyada Al-Shabaab ayaa weeraro ku dhufo oo ka dhaqaaq ah ku qaada xarumaha ciidamada Kenya ku yaalla halkaasi, maadaama ay weli kooxda si weyn ugu xoogan tahay gobollada Jubbooyinka ee koonfurta dalka Soomaaliya.