Muqdisho (Caasimada Online) – Hay’adda Duulista Rayidka Soomaaliyeed (SCAA) ayaa maanta ku dhawaaqday in aan muwaadiniinta Soomaaliyeed ee imanaya dalka aan looga baahneyn inuu horay usoo qaato wax fiiso (Visa) ah.
Hay’adda ayaa shaacisay in qof kasta oo Soomaali ah ee sita Baasaboor kasta iyo goob walba oo kasoo dhoofayo fiisaha lagu siin doono garoommada dalka (visas on arrival).
Wargelintan kasoo baxday Hay’adda Duulista Rayidka Soomaaliyeed (SCAA) ayaa sida la fahamsan yahay daba socoto guux badan oo ka dhashay in Soomaalida qurbaha marka ay usoo safrayaan dalka lagu xiro shuruuddo la xiriira dal-ku-galka.
Laba maalin kahor ayay aheyd markii hay’adda Socdaalka iyo Jinsiyadaha Soomaaliya ay soo saartay war-saxafadeed ay ku cadeysay in amar dhankooda ka yimid oo shuruudo la kordhiyay ah uusan jirin.
“Iyada oo la tixraacayo qoraalada baraha bulshada lagu baahiyay ee ku saabsan shuruudaha dal-kugalka Soomaaliya, ma jirto wax ammar cusub oo kasoo baxay Hay’adda Socdaalka iyo Jinsiyadda,” ayaa lagu yiri qoraalka hay’adda Socdaalka iyo Jinsiyadaha Soomaaliya.
Sidoo kale waxay ku waxay wargelisay shirkadaha diyaaradaha inay qaadaan xanibaadaha (haddii ay jiraan), islamarkaaja ay qof kasta oo Soomaali ah u oggolaadaan inay soo qaadaan.
“Maadaama arrintaan taagani ay la xiriirto bulshada Soomaaliyeed ee ku safraya baasabooro ajnabi ah, dhamaan shirkadaha diyaaradaha ee sameeya duulimaadyada caalamiga ah ee ka yimaada Yurub iyo dhanka Mareykanka waxaa la faray inay qaadaan xanibaadaha (haddii ay jiraan) oo qof kasta oo Soomaali ah – qof weyn iyo mid yar-ba ay u oggolaadaan inay soo qaadaan.”
Qoraalka hay’adda ayaa sidoo kale lagu yiri “Dal-ku-galka waxaa la bixiyaa marka la yimaado xadka Soomaaliya sida ay had iyo jeer ahaan jirtay, mana jiraan wax isbedel ah oo lagu sameeyay siyaasaddaas.”
