Tehran (Caasimada Online) — Dowladda Iiraan ayaa hanjabaad culus u dirtay Isutagga Imaaraadka Carabta, iyadoo ku eedeysay inuu door ku lahaa weerarradii dhowaan uu Mareykanku ku qaaday dalkeeda.
Jamhuuriyadda Islaamiga ah ee Iiraan ayaa sheegtay inay qaadi doonto tallaabooyin militari oo ka dhan ah Imaaraadka, iyadoo si cad u sheegtay in jawaab kasta oo ay bixiso ay noqon doonto mid culus oo aan si fudud loo illoobi doonin.
Ismaaciil Kowsari, oo xubin ka ah Guddiga Amniga Qaranka iyo Siyaasadda Arrimaha Dibadda ee Baarlamaanka Iiraan, ayaa sheegay in Tehran ay si toos ah u beegsan doonto Imaaraadka, kaas oo ay ku eedeysay inuu garab istaagay weerarrada lagu qaaday dalkeeda.
Bartilmaameedyada ciidamada Iiraan ayaa waxaa ka mid noqon kara kaabeyaasha dhaqaalaha iyo gaadiidka ee Imaaraadka, sida waddooyinka tareennada, garoomada diyaaradaha, dekedaha, xarumaha ganacsiga, goobaha saliidda iyo gaaska, iyo xarumaha kale ee muhiimka u ah dhaqaalaha dalkaas.
Hanjabaaddan ayaa ku soo beegmaysa xilli ay sii kordhayaan xiisadaha u dhexeeya Iiraan, Mareykanka iyo Israa’iil, iyadoo dalalka gobolka ay si dhow ula socdaan xaaladda. Ilaa iyo hadda, dowladda Isutagga Imaaraadka Carabta kama aysan jawaabin eedeymaha iyo hanjabaadaha cusub ee ka soo baxay Tehran.
Sidoo kale waxay imaanaysa xilli Madaxweynaha Mareykanka Donald Trump iyo Ra’iisul Wasaaraha Israa’iil Benjamin Netanyahu ay u tashanayaan Iiraan. Labada mas’uul ayaa ka wada-hadlay arrimo la xiriira amniga Bariga Dhexe iyo tallaabooyinka suurtagalka ah ee laga qaadi karo Tehran.
Trump ayaa Khamiistii khadka taleefanka kula hadlay hoggaamiyaha Israa’iil, iyadoo labada dhinac ay ka wada hadleen xaaladihii ugu dambeeyay ee la xiriiray Iiraan iyo tallaabooyinka la qorsheynayo.
War-saxaafadeed ka soo baxay xafiiska Netanyahu ayaa lagu sheegay in labada hoggaamiye ay isla soo qaadeen “tallaabooyin la isku dubbariday oo laga fulinayo jihooyin kala duwan,” halka Trump uu Netanyahu uga warbixiyay tallaabooyinka uu Mareykanku ka qaaday Iiraan iyo qorshayaasha la xiriira xaaladda gobolka.