Xog: Isbadal lagu sameenaayo sida loo ilaaliyo madaxweynaha Jabuuti kadib..

By Asad Cabdullahi Mataan

Djibouti (Caasimada Online) – Dowladda Jabuuti ayaa soo saartay baaritaan hor dhac oo ku aadan toogasho maalintii Isniinta ka dhacday gegida diyaaradaha Jabuuti xilli uu halkaas ka soo dagayay madaxweyne Ismaacil Cumar Geelle oo ka soo laabtay shirkii madaxda IGAD ee Addis Ababa ka dhacay.

Wasiirka arrimaha dibedda Jabuuti, Maxamed Cali Yuusuf ayaa VOA-da u sheegay in baaritaan hordhac ah oo la sameeyay ay muujinayaan askariga furay rasaasta in uu khilaaf kala dhexeeyay takhtarka gaarka ah ee madaxweynaha Jabuuti Korneel Idiris Cabdullaahi.

Wuxuu sheegay in markii la wareystay askariga rasaasta ku furay garoonka uu sheegay wax yaabo badan oo ku aadan khilaaf kala dhexeeyay korneel Idiris oo ahaa takhtarka gaarka ah ee ciidanka madaxtooyada Jabuuti ee Jamhuuriga.

Wasiirka arrimaha dibedda waxaa kaloo uu sheegay in dhacdadaas ay ku dhaawacmeyn ilaa seddax askari oo uu ka mid yahay Korneel Idiris kaasoo uu xaaladiisa ku tilmaamay mid halis ah in kastoo lala tacaalayo siddii uu soo kaban lahaa.

Waxaa la weydiiyay bal in xilliga uu rasaasta furayay askariga uu ku sugnaa garoonka madaxweyne Ismaacil Cumar Geelle, wuxuu tilmaamay in xilligaas uu madaxweynaha ka tagay garoonka loona galbiyay gurrgiisa oo ku yaalla deeganka Haramuud ee caasimada Jabuuti.

Wasiirka ayaa dhinaca kale sheegay in wasiiro shan ah ay ku sugnaayeen garoonka xilligii rasaasta uu u furayay askariga oo ka tirsan ciidanka ilaalada gaarka ah ee madaxweyne Ismaacil Cumar Geelle, wuxuuna sheegay in ay aad u baqeyn oo ay ku carareyn xarunta VIP-da.

Isbadal lagu sameenaayo sida loo ilaaliyo madaxweynaha Jabuuti.

Wasiirka arrimaha dibedda Jabuuti ayaa tilmaamay in dhacdadaas markii ay dhacday la yeeshay kulan degdeg ah oo looga arrinsaday siddii wax looga badali habka loo ilaaliyo madaxweynaha dalka Ismaacil Cumar Geelle.

Dalka Jabuuti ayaa ugu horeeya waddamada ugu xasilloon geeska Afrika, waana dhacdadii labaad oo dalkaas ka dhacda sannadkan.

24-kii bishii May ayey ahayd markii koox argagixiso ah ay weerar ku qaadeyn maqaayad ay tagaan dadka ajnebiga ee dalka Jabuuti ku sugan.

Caasimada Online

Xafiiska Wararka Djibouti

Caasimada@live.com