Jawaari oo runta u sheegay Madoobe & wararkii ugu dambeeyay Baydhaba

By Asad Cabdullahi Mataan

Muqdisho (Caasimada Online) – Guddoomiyaha golaha baarlamaanka, Maxamed Cismaan Jawaari oo muddo labo toddobaad ku sugan magaalada Baydhabo ayaa sheegay in maamul seddax gobal looga dhawaaqi doono magaalada maalmaha na soo aadan.

Jawaari ayaa tan iyo markii uu tagay Baydhabo wuxuu kulamo la qaatay dhinacyada isku khilaafsan magaalada, xildhibaanno iyo waxgarad, wuxuuna u sheegay qorshaha ku aadan in ay doonayaan maamul seddax gobal in loo sameeyo Baay, Bakool iyo Shabeellaha Hoose.

Jawaari ayaa u sheegay Madoobe Nuunow iyo taageerayaashiisa in ay la laabtaan mowqifkooda ku aadan maamul lix gobal wixii hadda ka dambeeyaana in ay ku biiraan maamulka seddaxda gobal.

Wariye ku sugan Baydhabo ayaa sheegay in arrintaas Madoobe Nuunow iyo taageerayaashiisa ay qaadan waayeen isla markaana ay guddoomiye Jawaari u sheegeen in mowqifkooda aanu waxbo iska badali doonin.

Si kastaba, Jawaari oo horrey uga mid ahaa dadkii taageersanaa maamulka lixda gobal isla markaana goob joog ka ahaa dhismaha maamulkan ayaa hadda u muuqda mid wax iska badaleen.

Dhinaca kale, Siyaasad Sheekh Daahir oo ah afhayeenka guddiga maamul u sameenta maamulka seddaxda gobal ayaa warbaahinta u sheegay in danjire Nichalas Key oo dhawaan tagay Baydhabo uu ballan qaaday siddii uu dhaqaale ugu bixin lahaa dhammeestirka maamulka seddaxda gobal ee koonfur galbeed.

Wuxuu tilmaamay in kulan ay la qaateen guddigooda in looga hadlay siddii QM ay u dhammeestiri lahayd dhaqaalaha ku baxaya sameenta maamulka seddaxda gobal ee koonfur galbeed.

Ma cadda halka ay ku dhammaan doonto xiisadda siyaasadeed ee ka taagan Baydhabo.

Caasimada Online

Xafiiska Wararka Muqdisho

Caasimada@live.com