Kheyre oo raali-gelin buuxda siiyey CC Shakuur

Asad Cabdullahi MataanBy Asad Cabdullahi Mataan

Muqdisho (Caasimada Online) – Ra’iisul Wasaarihii hore ee Soomaaliya Xasan Cali Kheyre, oo hadda ah musharax madaxweyne ayaa caawa raali-gelin buuxda ka siiyey siyaasigii Cabdiraxmaan Cabdishakuur weerarkii ay ciidamo ka tirsan dowladda ku qaadeen gurigiisa, intii uu Kheyre madax ka ahaa xukuumadda.

Weerarkan oo 17-kii December 2017 ay fuliyeen ciidamo ka tirsan Nabad-Sugidda,  ayaa waxaa lagu dilay 6 ka mid ah ciidamada ilaalada u ahaa Cabdiraxmaan Cabdishakuur, ayada oo sidoo kalena isaga lagu xiray.

Kheyre ayaa waxaa wehliyey Shariif Xasan Sheekh Aadan iyo Senator Dhagdheer.

Qoraal uu soo dhigay bartiisa facebook ayuu Kheyre ku yiri “Waxaan caawa hoygiisa ku soo booqday hogaamiyaha xisbiga wadajir, ahna musharrax madaxwayne ee jamhuuriyada federaalka Soomaaliya, Mudane Cabdiraxman cabdishakuur Warsame, halkaas oo aan si walaaltinnimo ku dheehantahay isugu soo qalbi xaarannay.”

Waxa uu intaas ku dara “Waxaanan ka raalli galiyay dhibkii 17kii December 2017 isaga iyo ilaaladiisa kasoo gaaray dhacdadii ka dhacday hoygiisa.”

Xog ay heshay Caasimada Online ayaa sheegeysa in Madaxda Madasha ay diideen in Musharax Kheyre uu ka soo qeyb galo Shirka berri ee Midowga Musharixiinta uga furmaya magaalada Muqdisho.

Madaxda Madasha ayaa la sheegay in ay Kheyre ku cadaadiyeen in uu marka hore cudur daar ka bixiyo wixii dhacay saddexdii sano ee la soo dhaafay, intuu ka midka ahaa nidaamka Madaxweyne Farmaajo, wuxuuna ka billaabay inuu raali-geliyo Cabdiraxmaan Cabdishakuur, maadaama ay ahayd dhacdadii ugu weyneyd, iyo tan kaliya ee dad ay ku dhinteen.