XASAN SHEEKH oo war ka soo saaray dagaalada Shabellaha Hoose & Hiiraan

By Asad Cabdullahi Mataan

Muqdisho (Caasimada Online)-Madaxweynaha Soomaaliya ayaa ku baaqay in la joojiyo dagaalka ka socda qeybo ka mid ah gobalada dalka gaar ahaan Shabeellooyinka iyo Hiiraan.

Madaxweynaha oo khudbad ku aadan munaasabadda ciidda soo qaad ka jeedinaayay masjidka Isbaheesiga ayaa codsaday in la isku kaashado siddii loo damin lahaa dagaal beeleedyada dib uga soo cusboonaaday gobalada qaar ee dalka, wuxuuna sheegay in dagaal uusan faa’ido lahayn marka laga reebo in dad ay ku baaba’aan.

Madaxweynaha ayaa xusay in dowladiisa ay dedaal ballaaran ay galin doonto siddii loo joojin lahaa dagaallada ka socda qeybo ka mid ah gobalada dalkaas kuwaasoo salka ku haya arrimo qabiil.

Dowladda Soomaaliya ayaa hadda u muuqata mid awood badan aan u heynin joojinta dagaallada ka soo cusboonaaday gobalada koonfureed ee dalka, waxaana ay ku soo goobtay itaalkeeda in ay ku baaqdo in la joojiyo dagaallada.

Si kastaba, dagaallada ka socda Shabeellaha Hoose iyo Hiiraan ayaa la sheegay in aysan u dhexeynin qabaa’ilo ee ay jiraan dad kale oo ka soo jeeda meelo kale oo dagaalka ku lug leh, kuwaasoo qeyb ka ah dadka hurinaya.

Dowladda dhowr jeer ayey isku dayday in la soo afmeero dagaallada balse arrintaas uma muuqato mid soo afjarantay.

Caasimada Online

Xafiiska Wararka Muqdisho

Caasimada@live.com