Qaahira (Caasimada Online) – Madaxweynaha Soomaaliya, Xasan Sheekh Maxamuud oo weli ku sugan dalka Masar ayaa magaalada Qaahira kula kulmay Madaxa Ururka Jaamacadda Carabta Axmed Abuu Al-qeyd oo ay ka wada-hadleen arrimo xasaasi ah.
Ugu horreyn madaxweyne Xasan Sheekh ayaa ku bogaadiyey dalalka iyo guddoonka Jaamacadda Carabta mowqifka ay ku taageereen midnimada iyo madaxbannaanida Soomaaliya, kadib xadgudubkii ay kula kacday dowladda federaalka Itoobiya.
Madaxweynaha ayaa sidoo kale ka mahadceliyay go’aanka guddoonka iyo dalalka Ururka Jaamacadda ay kaga hor yimaadeen damaca gurracan ee ra’iisul wasaaraha Itoobiya, kuna taageereen midnimada iyo madaxbannaanida Soomaaliya.
Sidoo kale labada mas’uul ayaa iska xog wareystay amniga iyo istaraatijiyada badda Cas ee marinka muhiimka ah ee Baab al-Mandeb iyo xaaladda geeska Afrika, iyaga oo dul istaagay cawaaqib xumada ka dhalaneysa tallabooyinka qar iska tuurka ah ee maamulka Addis Ababa ay ku faragaliyeen midnimda dhuleed ee Jamhuuriyadda Soomaaliya.
Dhinaca kale Madaxweyne Xasan Sheekh ayaa Jaamacadda Carabta la wadaagay tallaabada ay qaadeyso dowladdiisa ee ku aadan mowqifka mideysan ee shacabka iyo dowladda Soomaaliyeed ay ku diideen damaca xukuumadda ra’iisul wasaaraha Itoobiya ee ka dhanka ah baddeenna iyo dhulkeenna.
Ugu dambeyn Xoghayaha Guud ee Jaamacadda Carabta Mudane Axmed Abuu Al-qeyd ayaa muujiyay dadaalka iyo garab istaaga Jaamacadda Carabta ee lagu xoojinayo midnimada iyo gobanimada Soomaaliya, axaana uu sheegay inaanan la aqbali karin xadgudubka dhanka ah Jamhuuriyadda Soomaaliya oo saldhig u ah xasilloonida gobolka.
Soomaaiya ayaa haatan taageero caalami ah ka heshay waddamio badan iyo ururada ay qaybta ka ah, taas oo go’doon gelisay Itoobiya oo xadgudub u geysatay dowladda dhexe.
