Dhuusamareeb (Caasimada Online) – Madaxweynaha Soomaaliya Mudane Xasan Sheekh Maxamuud oo weli ku sugan magaalada Dhuusamareeb ee caasimada maamulka Galmudug ayaa la filayaa inuu so afmeero qorshaha socdaalka uu halkaasi ku joogo.
Madaxweynaha ayaa lagu wadaa inuu dib ugu soo laabta magaalada Muqdisho ee caasimada dalka, muddo bil ka badan oo uu ku sugnaa Dhuusamareeb iyo furimaha hore ee dagaalka.
Xasan ayaa Arbacadii xarunta howl-gelinta ciidanka ee Dhuusamareeb kulan gaar ah kula yeeshay saraakiisha guutooyinka ciidamada Gorgor ee Ciidanka Xoogga Dalka Soomaaliyeed, isaga oo saraakiisha ka dhageystay warbixinno la xiriira dagaalka kooxda Al-Shabaab ka dhanka ah.
Madaxweynaha ayaa kulankaas ka sheegay in dagaalka socda uu yahay “halgan gobonnimo u dirir ah” oo lamid ah midkii lagu raadinayay xorriyadda shacabka Soomaaliyeed iyo qarankooda, loogana soo horjeeday gummeystihii shisheeye.
“Waxaad ku jirtaan dagaal waafaqsan mabaadii’da Shareecada Islaamka loogana helayo ajar Alle agtiisa. Wadankaan wadadii uu ku gaari lahaa sharafta iyo karaamada umadaha kale leeyihiin ayaad naftiina u hureysaan, dowlada iyo shacabka Somaaliyeedna waa idin garab taaganyahay,” ayuu yiri madaxweyne Xasan Sheekh.
Xasan Sheekh oo magaalada Dhuusomareeb tegay 5-tii bishii hore ee August, ayaa muddadaas booqday deegaano kale oo kamid ah gobollada dhexe si uu u dhiiri-geliyo dagaalka ka dhanka ah Al-Shabaab, kahor inta aanu dib ugu soo laaban caasimadda Galmudug.
Ciidamada dowladda oo kaashanaya shacabka hubeysan, ayaa tan iyo waqtigaas dagaallo dhowr ah la galay kooxda Al-Shabaab, kuwaasi oo ay kaga qabsadeen deegaano dhowr ah.
Isku soo wada duubo, dagaalka kooxda Al-Shabaab ayaa si dardar leh uga socda gobollada dalka, iyada oo dhowr jiho gobollada Galgaduud iyo Mudug ka billowdeen dagaallo la doonayo in kooxda looga xoreeyo deegaanada ay ku hareen ee maamulka Galmudug ayaa madaxweynaha la filayaa inuu Muqdisho ku laabto.
Sidoo kale wejiga labaad ee dagaalka Al-Shabaab ayaa dhawaan bilaaban doona, kadib marka uu soo idlaado gulufka uu muddooyinkii dambe madaxweyne Xasan Sheekh xarunta uga dhigtay Dhuusamareeb, kaasi oo dhameystir u ah wejiga koowaad ee dagaalka, si loo guda-galo wejiga xiga oo ay qeyb ka noqonayaan ciidamo ka socda dalalka deriska.
