Garoowe (Caasimada Online) – Wasiirka Kalluumeysiga dowlad-goboleedka Puntland Dr. Rashiid Maxamuud Yuusuf ayaa shaqo joojin ku sameeyay agaasimaha guud ee wasaaraddaasi, kadib khilaaf soo kala dhex-galay labada masuul.
Wasiirka ayaa sheegay in shaqo joojinta agaasimaha uu u cuskaday kadib markii uu agaasime Sharmaarke Yaasiin Cali uu baalmaray habraacyadii iyo nidaamkii shaqada ee wasaaradda.
“Taas ayaa sababtay in ay lunto kala dambeyntii shaqada,” ayuu wasiirka kalluumeysiga dowlad-goboleedka Puntland ku yiri warqadda uu shaqada kaga joojiyay agaasimaha guud ee wasaaradda.
Sidoo kale waxa uu ku eedeeyay agaasimaha inuu sameeyay amar diido aan sharciga waafaqsanayn iyo tallo qaadasho la’aan, taasi oo uu sheegay inay meesha ka saartay kala dambeyntii iyo kala warqaadashadii shaqada.
“Marakaan arkay ficilada shaqo khal-khalgelunta Agaasimaha Guud ee Wasaaradda laga la bilaabo maanta waxaa shaqadii laga joojiyey Sharmaarke Yaasiin Cali, Agaasimaha Guud ee Wasaaradda Kalluumeysiga iyo Kheyraadka Badda Dowladda Puntland.”
Warqadda ayaa sidoo kale waxaa toos loogu socod-siiyay xisaabiyaha guud ee dowlad-goboleedka Puntland, ayada oo wax ka ogyihiin go’aanka wasiirka, ku-xigeenkiisa, wasiiru-dowlaha wasaaradda iyo ku-simaha madaxweynaha ahna madaxweyne ku-xigeenka dowlad-goboleedka Puntland.
Wasiirka Kalluumeysiga iyo agaasimaha ayaa muddooyinkii dambe la sheegayay inuu khilaaf xooggan soo kala dhex galay, kaasi oo ugu dambeyntii sababay in wasiirka uu shaqo joojin ku sameeyo agaasimaha guud ee wasaaradda.
