Hargeysa (Caasimada Online) ― Xildhibaan Naasir Cali Shire oo ka mid ah baarlamaanka Somaliland, isla markaana ka mid ahaa lixdii xubnood ee Somaliland ugu qeyb galayey caleema saarka Axmed Madoobe, ayaa maanta shaaciyay inuu ka baaqday safarkaasi.
Xildhibaan Naasir ayaa sheegay inuu dib uga laabtay qorshihii uu markii hore uga mid noqday wafdigaasi, isagoona xusay in arrintaasi dhaawac ku tahay madax-banaanida Somaliland.
Xildhibaan Naasir Cali Shire oo maanta warbaahinta kula hadlayey gudaha magaalada Hargeysa ayaa waxa uu yiri “Waan ka noqday go’aankii aan kaga qeyb gali lahaa caleema-saarka Madaxweynaha Jubbaland Axmed-Madoobe”.
“Waxaan u taanusalay qarankayga iyo shacabkayga Somaliland oo u arkay inay dhaawac iyo dhiig bax ku tahay qaranimada Somaliland in aan caleema saarkaas ka qeyb galo” ayuu hadalkiisa sii raaciyay.
Xildhibaanka ayaa sidoo kale waxa uu sheegay in go’aankiisan uu kaga noqday kamid noqoshada wafdigan ay gacan ku lahaayeen dad badan oo arrinkaasi kala hadlay “Dad badanina wey ila soo xidhiidheen aadna wey igala hadleen arinkaas”.
Hadalka xildhibaanka ayaa waxa uu ku soo aadaya xili ay dood badan ka taagneed Wafdiga Somaliland ee dhowaan la shaaciyay inuu ka qeyb gali doono caleema-saarka Axmed Madoobe, taasi oo ay si adag uga soo hor-jeesteen qaar kamid ah Siyaasiyiinta Somaliland.
Xafiiska Hargeysa
Caasimada@live.com
