Maxaa ka jira in Ceynte loo wado safiirka Kenya mise ogtahay inay arintaasi ka hor imaan doonta hanaanka 4.5 ?

By Asad Cabdullahi Mataan

Muqdisho (Caasimada Online ) – Dowladda xididka ah ee madaxweyne Farmaajo ayaa qaab ahaan sii xumaaneysa iyadoo laga cabsi qabo in naas nuujin beeleedku uu sii xoogeysto.

Warar lagu kalsoonyahay ayaa sheegaya madaxweyne Farmaajo iyo Ra’iisul wasaare Kheyre iney doonyaan in C/raxmaan Yuusuf Ceynte laga dhigo safiirka cusub ee Somalia u farisan doona wadanka Kenya.

Jamaal Xasan oo booskaan joogay ayaa ku biiray golaha wasiirada cusub ee Somalia halka Cabdi Ceynte oo wasiiradii hore ka mid ahaa uu hada noqday mid ka mid ah gacan yarayaasha Farmaajo.

Ilo muhiim ah ayaa sheegay in Farmaajo uu kala hadlay madaxweyne Uhuru Kenyatta arinta magacaabista C/raxmaan Yuusuf Ceynte oo ay qaraabo yihiin Ra’iisul wasaare Xasan Cali Kheyre.

Waxaa la sheegaya in arintaan aad loo kar karinaayo oo ay xitaa kulug leedahay xaaska madaxweyne Farmaajo.

Dood badan ayaa la filaya iney arintaan ka keento beesha Daarood , Shaqsiyaad lagu kalsoon yahay ayaa sheegay in aaney aqbali doonin in Hawiye wada qaato labada safaaradood ee Kenya iyo Itoobiya oo ay dano badan oo siyaasadeed kala dhaxeyso Somalia.

Beesha Hawiye ayaa heysata safaarada Soomaaliya ay ku leedahay Itoobiya , sidoo kale arintaan waxaa la filaya iney muran ka dhex dhaliso habka awood qeybsiga ee beesha Hawiye.