Muqdisho (Caaasimada Online) – Ra’iisul Wasaaraha Soomaaliya, Xamza Cabdi Barre ayaa maanta kulan gaar ah la yeeshay danjiraha dowladda Masar u fadhiya Soomaaliya Mudane Maxamed Saalax Xasan Keshtaax, iyaga oo ka wada-hadlay arrimo xasaasi ah.
Labada mas’uul ayaa kulankooda diirradda ku saaray arrimo ay ka mid yihiin danaha muhiimka ah ee labada dal, gaar ahaan maalgashiga Soomaaliya, siiba dhanka caafimaadka iyo tamarta.
Ugu horreyn Ra’iisul wasaaraha ayaa ka warbixiyay xaaladda bini’aadannimo ee ka taagan qeybo kamid ah dalka, iyada oo ay baaqdeen roobabkii deyrta, taas oo saameyn ku yeelatay nolosha dadka iyo duunyada ku dhaqan gobollo badan oo kamid ah dalka.
Ra’iisul Wasaaraha ayaa sidoo kale dowladda Masar ku bogaadiyay waxgalnimadeeda iyo hiilkeeda aan isbaddelin ee ay la barbar taagan tahay shacabka iyo dowladda Soomaaliya.
Sidoo kale wuxuu intaas ku daray in si buuxda loo soo celiyay nabaddii iyo amnigii qeybo badan oo ka mid ah dalka, haddana ay Soomaaliya diyaar u tahay maalgashi toos ah oo lagu sameeyo kaabayaasha kala duwan ee dalku leeyahay.
Dhankiisa Danjiraha Masar ee Soomaaliya Maxamed Saalax, ayaa Ra’iisul Wasaaraha uga mahadceliyey qaabilaadda, wuxuuna sheegay in dowladda Masar ay sii xoojin doonto heshiisyadii iskaashi ee horey loo galay ee diiradda saarayay dhinacyada muhiimka u ah danaha labada dal.
Masar ayaa haatan iskaashi xooggan la leh Soomaaliya, waxaana ay diiradda saareen dhanka milatariga, iyada oo la filayo in Qaahira ay ciidamo usoo dirto dalka, kuwaas oo kamid ah noqonayo howlgalka Midowga Afrika ee magaciisa loo soo gaabiyo AUSSOM.
