Muqdisho (Caasimada Online) – Ciidamada Qaranka ayaa maanta howl-gallo culus ka sameeyay aagga Beerta Cali Mahdi, xilli uu dalka ka socdo dagaalka kooxda Al-Shabaab ka dhanka ah.
Howl-galkaan oo ahaa mid lagu xaqiijinayo ammaanka ayaa ciidamada ka sameeyeen jiinka wabiga Shabeelle, gaar ahaan aagga Beerta Cali Mahdi iyo deegaanada dhaca duleedka caasimadda.
Howl-galladan oo si wada jir ah ay u sameeyeen urrurka 2-aad ee guutada 22-aad Booliska sida Militariga u tababaran iyo NISA ayaa looga gol leeyahay xaqiijinta amniga caasimadda, sida lagu sheegay bayaan kooban oo kasoo baxay dowladda.
Beerta Cali Mahdi ayaa sidoo kale horraanta bishii hore howl-gal qaatay muddo saacado ah ahaa, kaasi oo si wada-jir ah u fuliyeen ciidamo ka tirsan NISA, gaar ahaan Duufaan iyo kuwo kale oo ka tirsan ciidamada Booliska ee u tababaran sida milatariga.
Howl-galkaas ayay ciidamada kusoo qabteen rag lagu tuhmayo inay ka tirsan yihiin kooxda Al-Shabaab, kuwaasi oo lagu sameynayo baaritaano dheeraad ah.
Deegaanada la beegsaday ee uu ka dhacay howl-galkaasi ayaa la xaqiijiyay in ay ahaayeen kuwo istaraatiiji ah oo isku xira gobollada Banaadir iyo Shabeellooyinka.
Dhawaan ayay aheyd markii ciidanka Booliska gaarka ah ee Haramcad ay howl-gal qorsheysan ka sameeyeen deegaano hoostaga degmada Afgooye, kuwaasi oo lagu bartilmaameedsaday goobo muhiim u ahaa kooxda Al-Shabaab
