New York (Caasimada Online) – Xulka Qaranka Spain ayaa xalay ku guuleystay Koobka Adduunka 2026, kaddib markii ay 1-0 kaga adkaadeen Xulka Qaranka Argentina, iyada oo ay dhex-martay ciyaar adag oo la isku mari waayay 90-kii daqiiqo, balse lagu kala baxay waqtiga dheeriga ah.
Kulanka oo ka dhacay New York New Jersey Stadium ayaa ahaa mid ay labada xul ku soo bandhigeen ciyaar adag oo leh feejignaan sare. Spain ayaa inta badan maamulaysay kubadda, waxayna abuurtay fursado badan, halka Argentina ay ku tiirsaneyd difaac adag iyo badbaadino uu sameeyay goolhaye Emiliano Martínez.
Markii 90-kii daqiiqo lagu kala bixi waayay barbaro goolal la’aan ah, ciyaarta ayaa gashay waqti dheeri ah. Xaaladda Argentina ayaa sii adkaatay markii Enzo Fernández la siiyay kaarka casaanka kaddib digniintii labaad, taasoo ku qasabtay inay 10 ciyaaryahan ku dhammaystaan kulanka.
Guusha Spain waxaa xaqiijiyay weeraryahanka Ferran Torres, kaas oo daqiiqaddii 106-aad shabaqa ku hubsaday kubaddii guusha, isagoo ka faa’iideystay weerar joogto ah oo ay Spain ku cadaadinaysay difaaca Argentina. Goolkaas ayaa noqday kii lagu kala baxay final-ka.
Si kastaba, Argentina ayaa isku dayday inay soo laabato daqiiqadihii ugu dambeeyay, hase yeeshee difaaca Spain iyo goolhaye Unai Simón ayaa si adag u ilaashaday hoggaanka, taasoo xaqiijisay in Spain ay qaaddo koobka markii labaad taariikhdeeda, 16 sano kadib hanashadeedii ugu horreysay ee 2010.
Guushan ayaa sidoo kale sii xoojisay sumcadda tababare Luis de la Fuente, kaasoo Spain ku hoggaamiyay guulo waaweyn sanadihii u dambeeyay. Dhinaca kale, final-kan ayaa loo arkaa inuu noqon karo kulankii ugu dambeeyay ee Lionel Messi u ciyaaro Koobka Adduunka, taasoo ka dhigtay habeen xusuus gaar ah leh inkastoo Argentina laga adkaaday.
Dhanka kale, Dabaal-degyo waa wayn ayaa weli ka socda guud ahaan dalka Spain, kadib markii ay ku guuleysteen Koobka Adduunka markoodii labaad taariikhida, iyaga oo horay ugu guuleystay 2010-kii
Koobka Adduunka oo ay sanadkan hanatay Spain, wuxuu ka kooban yahay 6.175 kiilo, waxaana dahabka ku jira lagu qiimeeyay ku dhowaad $713,000 (ama £532,000), sida lagu sheegay falanqayn ay samaysay London Stock Exchange Group (LSEG).