Stuttgart (Caasimada Online) — Taliska Ciidamada Mareykanka ee Afrika (AFRICOM) ayaa kordhiyay duqeymaha cirka ee uu ka wado gudaha Soomaaliya, iyadoo uu sii kordhayo walaaca ku saabsan dagaalyahannada kooxda Daacish, sida ay muujinayaan xogaha rasmiga ah ee militariga.
Tan iyo bishii Janaayo, AFRICOM wuxuu fuliyay 25 duqeyn oo cirka ah, gudaha Soomaaliya, kuwaas oo intooda badan lala beegsaday dagaalyahanno ka tirsan Daacish, sida lagu sheegay warbixinada weerarrada ee taliska.
Haddii xawaaraha weerarrada cirka uu sidan kusii socdo, AFRICOM wuxuu dhaafi doonaa 63-kii weerar ee uu Soomaaliya ka fuliyay sanadkii 2019, taasoo ahayd tiradii ugu badnayd ee abid uu talisku ka sameeyo dalka, waxayna dhigi doonaan rikoor cusub.
“Haa — waxaan aragnay koror ku yimid weerarrada cirka,” ayay tiri afhayeenka AFRICOM, Kelly Callahan, oo khamiistii war-saxaafadeed soo saartay.
Kororka weerarrada ayaa la xiriira amar uu Wasiirka Difaaca Mareykanka Pete Hegseth bixiyay bishii Janaayo, kaasoo AFRICOM siiyay awood dheeraad ah oo lagu gaari karo go’aanno la xiriira duqeymaha.
Taliyaha AFRICOM, General Michael Langley, ayaa mar uu hortagay Senate-ka bishii April sheegay in awoodahaas cusub ay taliska u oggolaadeen “in si adag loogu dhufto (argagixisada).”
Duqeyntii ugu dambeysay oo dhacday Axaddii ayaa lagu beegsaday dagaalyahannada Daacish-Soomaaliya ee ku sugan Buuraha Golis ee waqooyi-bari dalka. Weerarradan is-daba-joogga ah ayaa imaanaya xilli ay dagaalyahanno ajnabi ah doonayaan inay ballaariyaan saldhiggooda Soomaaliya.
Callahan waxay sheegtay in kooxda Daacish-Soomaaliya ay 18-kii bilood ee la soo dhaafay korodhay ilaa 1,500 dagaalyahan, halka ay horay uga koobnayd 500. Waxaa la rumeysan yahay in ku dhowaad 60% ay yihiin dagaalyahanno ajaanib ah.
“Daacish-Soomaaliya, oo ah laan ka tirsan kooxda Daacish, waxay ka faa’iidaystay oo wadaagto hal-abuurnimo, dhaqaale, xeelado dagaal iyo qorsheyaal weerar oo ay la leeyihiin kooxaha kale ee Daacishee caalamka,” ayay tiri Callahan.
Ballaarinta Daacish ee gudaha Soomaaliya ayaa kusoo beegantay xilli AFRICOM uu sidoo kale la tacaalayo kooxda Al-Shabaab, taasoo ah bartilmaameed kale oo duqeymaha cirka loogu adeegsado.
Al-Shabaab, oo lagu qiyaaso inay u dhaxeyaan 7,000 ilaa 12,000 dagaalyahan, ayaa weli ah kooxda argagixiso ee ugu awoodda badan Soomaaliya iyo guud ahaan Afrika.
Ciidamada Mareykanka ee Soomaaliya ku sugan ayaa muddo dheer siiya dowladda dhexe taageero dhanka tababarka iyo la-talinta ah, si ay uga hortagto Al-Shabaab.
Hawlgalada AFRICOM ee socda waxaa ka mid ah tababarida iyo la-tashiga ciidamada maxalliga ah, iyo sidoo kale fulinta weerarro cirka ah oo lala kaashanayo dowladda Soomaaliya.
Langley wuxuu intaas ku daray, mar uu hortagayay Senate-ka, in Al-Shabaab weli tahay “khatar argagixiso oo sii kordheysa,” gaar ahaan tan iyo markii ay bilaabeen xiriir lala yeesho fallaagada Xuutiyiinta ee ka dagaalanta Yemen, dhinaca Badda Cas.
“Waxaan arrintaas si dhow ula soconnaa,” ayuu yiri Langley.
Falanqeeyayaal amni ayaa sheegay in iskaashi dhex mara Al-Shabaab iyo Xuutiyiinta uu u suurtagelin karo kooxda Al-Shabaab inay helaan hub casri ah oo horumarsan.
