Washington (Caasimada Online) – Xildhibaan Marjorie Taylor Greene, oo ka tirsan Aqalka Wakiilada Mareykanka, ayaa sheegtay in dilkii loo geystay Madaxweynihii hore ee Maraykanka John F. Kennedy laga yaabo inuu xiriir la lahaa mucaaradnimadiisii barnaamijka hubka nukliyeerka ee Israa’iil, iyadoo isla markaana su’aal ka keentay inay iyada ama Madaxweyne Donald Trump haatan wajahaan halis la mid ah.

“Waxaa mar jiray madaxweyne weyn oo ay shacabka Maraykanka aad u jeclaayeen. Wuxuu kasoo horjeestay barnaamijka hubka nukliyeerka ee Israa’iil, dabadeedna waa la dilay,” ayay qoraal ay ku baahisay barteeda bulshada ee X ku tiri xildhibaanadda ka tirsan xisbiga Jamhuuriga, lagana soo doorto gobolka Georgia.

“Ma inaan hadda dareemaa in noloshaydu khatar ku jirto? Ka warran Madaxweyne Trump oo si adag Israa’iil ugu dhaliilay saaka inay sii waddo weerarrada ay ku hayso Iiraan?” ayay sii raacisay.

Hadalka Greene ayaa yimid waxyar un kaddib markii Trump uu uga digay Israa’iil inay sii waddo duqeymaha cirka ah ee ka dhanka ah Iiraan, isagoo tallaabadaas ku tilmaamay mid “ku xadgudub weyn” ku heshiiska xabbad-joojinta.

Dagaallada shisheeye ee joogtada ah

Greene waxay sidoo kale si kulul u cambaareysay weerarradii dhowaan ciidamada Maraykanku ku qaadeen goobo nukliyeerka ah oo ku yaal Iiraan, iyadoo tallaabooyinkaasi ku tilmaantay dagaallo aan dhammaad lahayn oo lagu adeegayo dano shisheeye.

“Askarta Maraykanka ayaa loo dilay oo loo naafeeyay isbeddel maamul, dagaallo shisheeye iyo faa’iidada shirkadaha hubka ee warshadaha militari. Aad baan uga daalay arrintan,” ayay ku tiri qoraal kale oo ay soo dhigtay.

Madaxweyne Kennedy ayaa lagu dilay magaalada Dallas ee gobolka Texas sannadkii 1963. In kasta oo baaritaanno rasmi ah lagu soo gaba-gabeeyay in Lee Harvey Oswald, oo hore uga tirsanaa ciidamada badda ee Maraykanka, uu ka dambeeyay dilka, haddana dhacdadaas waxaa hareeyay warar xan iyo tuhunno is-daba joog ah.

Intii uu xilka hayay, Kennedy wuxuu muujiyay walaac ku saabsan damaca Israa’iil ee hubka nukliyeerka. Sannadkii 1963 ayuu cadaadis ku saaray ra’iisul wasaarihii xilligaas ee Israa’iil, David Ben-Gurion, inuu ka daah-furo macluumaadka xarunta nukliyeerka Dimona, isagoo ka digay in qarsoodigaasi uu “si dhab ah u khatar gelin karo” taageerada Maraykanka ee Israa’iil.

Si kastaba ha ahaatee, ma jiro caddeyn rasmi ah oo la xaqiijiyay oo xiriirinaysa dilka Kennedy iyo murankaas.

Hadalka Greene ayaa dhaliyay dhaleeceyn uga timid siyaasiyiinta mucaaradka ah iyo khubarada siyaasadda, kuwaas oo sheegay in hadalladeedu ay sii hurin karaan tuhunno aan caddayn loo hayn.

Greene weli ma aysan soo bandhigin wax caddeyn ah oo taageeraysa xiriirka ay ku samaysay dilka Kennedy iyo siyaasadda nukliyeerka Israa’iil.

Washington (Caasimada Online) – Agaasimaha hay’adda sirdoonka Mareykanka ee CIA-da, John Ratcliffe, ayaa sheegay Arbacadii in xog sirdoon oo lagu kalsoon yahay ay muujinayso in barnaamijka Nukliyeerka ee Iiraan uu soo gaaray “waxyeello ba’an” kadib duqeymihii cirka ee uu Mareykanku fuliyey dhowaan, iyo in dhowr goobood oo muhiim ah “la burburiyey.”

Qiimeyn horudhac ah oo ay samaysay Hay’adda Sirdoonka Difaaca (Defense Intelligence Agency) oo Talaadadii la dusiyey ayaa lagu ogaaday in duqeyntii Mareykanka ee saddexda goobood ee nukliyeerka Iiraan ay suuragal tahay in barnaamijka nukliyeerka ee dalkaas ay dib u dhigtay oo keliya dhowr bilood, taasoo ah saameyn ka kooban intii uu Madaxweyne Donald Trump sheegay kadib weerarada.

Khasaaraha dhabta ah ee la gaarsiiyey xarumaha nukliyeerka Iiraan iyo jiritaanka barnaamijkeeda ballaaran ayaa noqday arrimo siyaasadeysan oo xasaasi ah, iyadoo Trump iyo xulafadiisu ay cambaareeyeen faafinta warbixinta DIA-da iyo warbaahintii ka hadashay. Xildhibaannada Dimoqraadiga ayaa ku eedeeyay Aqalka Cad in laga yaabo inay buunbuuninayaan saameynta duqeymaha.

Ratcliffe wuxuu bartiisa bulshada ku sheegay in natiijooyinka CIA-da ay ku saleysan yihiin “xog sirdoon oo lagu kalsoon yahay” ayna ka hor imanayaan waxa uu ugu yeeray “warbixinno si sharci-darro ah lagu helay oo la baahiyey oo ku saabsan burburinta xarumaha muhiimka ah ee nukliyeerka Iiraan.”

Ratcliffe wuxuu soo xigtay sirdoon cusub “oo laga helay ilo/hab taariikh ahaan lagu kalsoonaa oo sax ahaa, kaasoo xaqiijinaya in dhowr xarun oo muhiim ah oo nukliyeerka Iiraan ah la burburiyey, dibna u dhisiddoodu ay qaadan doonto sannado badan.”

Tulsi Gabbard, oo ah agaasimaha sirdoonka qaranka, ayaa soo bandhigtay qiimeyn tan la mid ah horaantii maalintaas.

Khubarada xakameynta hubka iyo saraakiil hore oo sirdoon ayaa sheegaya in Iiraan ay dib u soo nooleyn karto barnaamijkeeda nukliyeerka xitaa haddii aysan jirin saddexda goobood ee la beegsaday, haddii ay ku guuleysato inay badbaadiso keyd ku filan oo ah Yuraaniyam heer sare ah loo nafaqeeyey (highly enriched uranium) iyo qalabka casriga ah ee loo yaqaan ‘centrifuges’.

Madaxa hay’adda Qaramada Midoobay u qaabilsan la socodka tamarta atoomikada, Rafael Grossi, ayaa Arbacadii ka sheegay magaalada Vienna inay suuragal tahay in Iiraan ay weli haysato keyd ah Yuraaniyam heer sare ah loo nafaqeeyey, inkastoo ay jireen duqeymo cirka ah oo Israa’iil wadey muddo 12 maalmood ah iyo weeraradii cirka ee Mareykanka ee dhammaadkii usbuuca. Waxaa laga yaabaa in Tehran ay rartay Yuraaniyamka isla markiiba kadib duqeymihii ugu horreeyay ee Israa’iil, ayuu yiri Grossi.

Kahor inta uusan Ratcliffe soo saarin bayaankiisa, Trump wuxuu ku gacan sayray qiimeynta DIA-da isagoo ku tilmaamay mid aan dhameystirnayn oo degdeg lagu sameeyey, wuxuuna si isdaba joog ah u sheegay in goobihii nukliyeerka Iiraan iyo barnaamijkeediiba “gebi ahaanba la tirtiray.”

Hay’adda DIA waxay ku calaamadisay qiimeynteeda horudhaca ah inay tahay mid “kalsooni yar,” sida ay sheegeen saddex ilo-wareed oo arrintan la socday.

Falanqeeyayaasha sirdoonka ayaa caadi ahaan soo bandhiga natiijooyinkooda iyagoo adeegsanaya heerar kalsooni oo kala duwan, taasoo ku xiran tayada iyo isku halleynta xogta la hayo.

Qiimeynta horudhaca ah ee DIA waxay ku saleysneyd natiijooyin la helay habeenimadii Axadda, qiyaastii 24 saacadood kadib duqeyntii Mareykanka ee ka dhanka ahayd saddexda xarun ee nukliyeerka Iiraan, sida uu sheegay mid ka mid ah ilo-wareedyada.

Qiimeyn buuxda oo lagu ogaanayo khasaaraha dagaalka ayaa weli socota, sida warbixintu intaas ku dartay, waxayna qaadan doontaa maalmo illaa toddobaadyo in la soo gabagabeeyo, sida uu sheegay mid ka mid ah ilo-wareedyada.

Xoghayaha Difaaca, Pete Hegseth, oo kula hadlayey weriyeyaasha shir madaxeedka NATO ee ka socday Netherlands, ayaa sheegay in qiimeynta DIA lagu asteeyey “kalsooni yar” sababtoo ah caddeynta waxa la duqeeyay “waxay ku aasan tahay buur hoosteed, waa la burburiyey waana la tirtiray.”

Warbaahinta NBC News ayaa Talaadadii werisay in qiimeynta horudhaca ah ay muujisay in duqeymuhu ay u badan tahay inay dib u dhigeen barnaamijka nukliyeerka ee Iiraan muddo saddex illaa lix bilood ah, laakiin aysan si kama dambeys ah u burburin barnaamijka nukliyeerka ee Iiraan sida uu Trump ku adkeystay.

Warbixinta sirdoonka ee horudhaca ah ma muujineyso in dhammaan keydkii Iiraan ee Yuraaniyamka heerka sare loo nafaqeeyey la burburiyey ama la helay, waxaana weli jira su’aalo ku saabsan qalabka casriga ah ee Iiraan ee loo yaqaan ‘centrifuges’, kuwaas oo aan laga helin goobihii nukliyeerka ee ay duqeeyeen diyaaradaha Mareykanka, sida ay NBC News sidoo kale werisay Talaadadii.

Guddiga Tamarta Atoomikada ee Israa’iil (Israeli Atomic Energy Commission) ayaa Arbacadii sheegay in duqeynta Mareykanka ay “ka dhigtay mid aan shaqeyn karin” xarunta bacriminta ee dhulka hoostiisa ku taalla ee Fordo.

“Waxaan qiimeyneynaa in duqeymaha Mareykanka ee xarumaha nukliyeerka Iiraan, oo lagu daray duqeymihii Israa’iil ee qaybaha kale ee barnaamijka nukliyeerka militariga ee Iiraan, ay sannado badan dib u dhigeen awoodda Iiraan ee horumarinta hubka nukliyeerka,” ayaa lagu yiri bayaan ka soo baxay guddiga.

Bayaanka ayaa intaas ku daray in “guushan ay usii jiri karto si aan xad lahayn haddii Iiraan aysan helin agab nukliyeer.”

Nairobi (Caasimada Online) – 16 qof ayaa ku dhimatay dibadbaxyo ka dhan ah dowladda oo Arbacadii ka dhacay guud ahaan Kenya, kuwaas oo intooda badan ay dileen booliska, sida uu sheegay madaxa hay’adda Amnesty Kenya.

Rabshadahan ayaa ku soo beegmay sannad kaddib markii mudaharaadyo looga horjeeday sharciga canshuuraha ay ku dhammaadeen weerar lagu qaaday xarunta baarlamaanka.

Kumanaan Kenyan ah ayaa dibadbaxyo ka dhigay waddooyinka si ay u xusaan sanad-guuradii mudaharaadyadii sannadkii hore, kuwaas oo ay ku dhinteen in ka badan 60 qof, iyadoo booliska ay sunta dadka ka ilmeysiisa iyo biyo xoog leh ku kala eryayeen dibadbaxayaasha caasimadda Nairobi, sida ay sheegeen warbaahinta maxalliga ah iyo goobjooge ka tirsan Reuters.

Qaar ka mid ah dibadbaxayaasha ayaa la galay iska hor-imaad booliska, waxaana lix iyo toban qof si rasmi ah loo xaqiijiyay inay dhinteen ilaa 8:30 fiidnimo, sida uu u sheegay Reuters agaasimaha fulinta ee Amnesty Kenya, Irungu Houghton, isagoo xusay in tirakoobkaasi ay si wadajir ah u xaqiijiyeen hay’adaha u dooda xuquuqda aadanaha ee caalamiga ah iyo Guddiga Qaranka Xuquuqda Aadanaha ee Kenya (Kenya National Commission on Human Rights – KNCHR).

“Intooda badan waxaa dilay booliska,” ayuu yiri Houghton, isagoo intaas ku daray in ugu yaraan shan qof si toos ah loo toogtay.

KNCHR, oo ah hay’ad dowladda maalgeliso, ayaa hore u sheegtay in siddeed dhimasho laga soo weriyay meelo kala duwan oo dalka ah, dhammaantoodna ay la xiriiraan “dhaawacyo kasoo gaaray rasaas toos ah”.

“In ka badan 400 dhaawac ayaa la diiwaangeliyay, kuwaas oo ay ku jiraan dibadbaxayaal, saraakiil boolis ah iyo suxufiyiin,” ayaa lagu yiri war-saxaafadeed uu guddigu ku baahiyay boggiisa rasmiga ah ee X (hore Twitter).

Guddiga xuquuqda ayaa sidoo kale xusay in boolisku si ballaaran ugu sugnaayeen waddooyinka, iyadoo ay jiraan “eedo sheegaya in la adeegsaday awood xad-dhaaf ah, oo ay ku jiraan rasaas toos ah, xabo caag ah iyo biyo xoog leh, taasoo sababtay dhaawacyo badan”.

“Waxaan u banaanbaxaynaa rabshadaha booliska, cadaadiska dowladda, canshuurta sareysa iyo dhammaan wixii ka qaldamay dalka,” ayuu yiri Anthony oo ah 25 jir sidoo kalena ka ganacsanayay calamada Kenya, balse diiday inuu sheego magaciisa oo buuxa.

Dowladda ayaa amartay idaacadaha iyo telefishinada inay hakiyaan baahinta tooska ah ee dibadbaxyada, kuwaas oo kusii baahay magaalooyin kale oo ka baxsan caasimadda sida magaalada dekedda leh ee Mombasa.

NetBlocks, oo ah hay’ad caalami ah oo la socota internet-ka, ayaa sheegtay in xaddidaad lagu soo rogay baraha bulshada sida Telegram.

“Waxaan halkan u joognaa inaan nahay jiilkii dhalinyarada ahaa. Waxaan rabnaa isbedel dhab ah oo nidaamka ah. Nidaamku waa qaldan yahay, nidaamku waa musuq,” ayay tiri Florence Achala oo ka mid ahayd dibadbaxayaasha Nairobi.

– ‘Mooryaanta’ –

Waxaa sii kordhaysa caro ka dhalatay xadgudubyada booliska, gaar ahaan kaddib markii macallin dhawaan lagu dilay isagoo gacanta booliska ku jira.

Kooxo dibadbaxayaal nabadeed ah ayaa toddobaadkii hore lagu weeraray koox mootooyin watay oo loo yaqaan “Mooryaan” kuwaas oo ku hubeysnaa ulo iyo karbaashyo, isla markaana lala xiriiriyay inay is kaashanayeen booliska.

Safaaradaha waddamada reer Galbeedka ee Kenya ku yaalla sida Britain, Jarmalka iyo Maraykanka ayaa bayaan wadajir ah oo ay soo saareen ku cambaareeyay isticmaalka “Mooryaan la kireystay” oo loo adeegsaday inay gudaha u galaan ama carqaladeeyaan isu imaatinka nabadda ah.

Inkasta oo aan mooryaanta si cad loo arkin Arbacadii shalay, haddana booliska ayaa isticmaalay sun badan oo dadka ka ilmeysiisa iyo biyo xoog badan oo ay kula dagaallameen dibadbaxayaasha.

Qareen siyaasadeed Javas Bigambo ayaa sheegay inuu ka walwalsan yahay in kooxaha siyaasadda ay ka faa’iideystaan xiisadda taagan si ay colaadda u sii huriyaan.

“Ma jirto wax wanaagsan oo laga xusi karo dhacdooyinkii sannadkii hore,” ayuu yiri. “Haddii aan daacad ka nahay inaan xusno 25-ka Juun, waa inay noqotaa xus xasiloon, duco iyo is-xakameyn leh.”

– Niyadjab –

Waxaa sii xoogaysanaysa niyadjabka laga qabo Madaxweyne Ruto oo talada qabtay sannadkii 2022 isagoo ballanqaaday horumar dhaqaale oo degdeg ah.

Dad badan ayaa ka niyad jabsan isbeddel la’aanta sii socota, musuq-maasuqa iyo canshuurta sareysa, xitaa kaddib markii mudaharaadyadii sannadkii hore ay ku qasbeen Ruto inuu ka laabto sharciga dhaqaalaha ee aan laga helin shacabka.

Dowladdiisa ayaa sanadkan isku dayaysay inay iska ilaaliso canshuur kordhin toos ah. Si kastaba ha ahaatee, maqnaanshaha soo noqnoqda ee dhaleeceeyaasha dowladda—iyadoo ururada xuquuqda aadanuhu ay tirinayaan in ka badan 80 qof oo weli la la’yahay—ayaa horseeday eedeymo sheegaya in Ruto uu Kenya ku celiyay xilligii madoobaa ee kaligii-talisnimada 1980-meeyadii iyo 1990-meeyadii.

Ruto ayaa horey u ballanqaaday inuu joojinayo afduubka, balse hadal uu jeediyay Talaadadii wuxuu si aan ka leex-leexad lahayn u sheegay inuu “garab taagan yahay” booliska.

Asmara (Caasimada Online) – Eritrea ayaa isku dayaysa inay meesha ka saarto xafiiska khabiirka Qaramada Midoobay ee baaraya eedaha tacaddiyada xuquuqda aadanaha, sida lagu sheegay dukumeenti loo gudbiyay Golaha Xuquuqda Aadanaha ee Qaramada Midoobay. Tallaabadan oo ah mid naadir ah ayaa diblomaasiyiinta reer Galbeedka ka walwalsan yihiin inay waddamada kale u noqoto tusaale ay ku raadsadaan sidii ay uga baxsan lahaayeen dabagalka iyo baaritaannada caalamiga ah.

Xafiiska Wakiilka Gaarka ah ee Qaramada Midoobay, oo hadda uu hayo qareenka xuquuqda aadanaha ee u dhashay Suudaan Maxamed Cabdisalaam Baabikar, ayaa loo igmaday inuu diiwaangeliyo xadgudubyada ka dhacaya gudaha Eritrea, halkaas oo ururrada bulshada rayidka ah sida Human Rights Watch ay sheegeen in ku-takrifalka xuquuqdu yahay mid baahsan oo aan lala xisaabtamin.

Warbixin uu soo saaray bishii May ayuu Baabikar ku tilmaamay xaaladda xuquuqda aadanaha ee Eritrea inay tahay mid aad u daran, isagoo soo bandhigay kiisas xarig aan sharci ahayn, dadka la waayo iyagoo la afduubtay, iyo adeegga qaranka iyo kan milateriga oo si dheer loogu hayo dadka, taasoo kumannaan qof ku qasbaysa inay dalka ka qaxaan.

Wasaaradda warfaafinta ee Eritrea iyo ergada diblomaasiyadeed ee dalkaasi ku leedahay Geneva ayaan markiiba ka jawaabin codsiyo loo diray oo ku aaddanaa inay arrintan ka hadlaan.

Eritrea, oo muddo dheer kasoo horjeedday xafiiskan, ayaa wafdi ballaaran u dirtay kulan ay Qaramada Midoobay ku yeesheen magaalada Geneva maalintii Isniinta, si ay usoo bandhigaan qorshahooda diiddan baaritaannada gaarka ah ee lagu beegsado dalalka gaar ahaan. Dalalka ay kamid yihiin Suudaan, Ruushka iyo Iiraan ayaa taageeray mowqifka Eritrea, halka Midowga Yurub iyo Britain ay kamid ahaayeen kuwa si xoog leh uga hor yimid, sida ay diblomaasiyiintu sheegeen.

Xafiiska khabiirka Qaramada Midoobay ee arrimaha Eritrea waxaa markii ugu horreysay la aasaasay sanadkii 2012, waxaana sanad walba cusboonaysiiya Golaha Xuquuqda Aadanaha ee fadhigiisu yahay Geneva, iyadoo dhowaan dadaalkaas uu hoggaaminayay Midowga Yurub. Sanadkanse Eritrea ayaa iyadu kahortagtay, iyadoo soo jeedisay mooshin kale oo looga golleeyahay in gabi ahaanba la joojiyo xafiiskaas, sida ku cad dukumeentiga.

Inkasta oo waddamada baaritaannada Qaramada Midoobay lagu sameeyo ay inta badan isku dayaan inay kahor yimaadaan ama daciifiyaan, haddana khubarada xuquuqda ayaa sheegaya in tani ay tahay markii ugu horreysay muddo ku dhow 20 sano jiritaanka golahan ee la hor keeno soo jeedin rasmi ah oo lagu doonayo in gabi ahaanba la baabi’iyo xafiis baaritaan xuquuqda aadanaha ah. Waxaana jira walaac laga muujinayo inay tani dhiirrigeliso waddamada kale ee raadinaya inay iska caabiyaan tallaabooyinka lala xisaabtamayo. Sannadkii 2023, Itoobiya ayaa isku dayday inay xafiis sidan oo kale ah kahor waqtiga xirto, balse markii dambe ay dib uga noqotay go’aankaas.

“Midowga Yurub wuxuu xusuusinayaa in madaxbannaanida iyo faro-gelinta la’aanta arrimaha gudaha aysan waddamada ka xoreynayn waajibaadkooda sharciga xuquuqda aadanaha ee caalamiga ah,” ayuu yiri ergayga Midowga Yurub warbixin uu la wadaagay Reuters, isagoo intaa ku daray in diidmada Eritrea aysan noqon karin sabab looga baxsado dabagalka caalamiga ah.

Inta badan baaritaannada kale ee uu goluhu qabto waxay ka yimaadaan dalalka reer Galbeedka, sida baaritaannada lagu hayo Ruushka iyo Suudaan. Mararka qaar, caddeymaha kasoo baxa baaritaannadaas ayaa loo adeegsadaa dacwad-oogayaasha caalamiga ah.

Codbixinta arrintan ayaa la filayaa inay dhacdo bisha soo socota.

New York (Caasimada Online) – Zohran Mamdani, oo ah 33-jir socialist dimoqraadi ah ayaa noqon doona duqii ugu horreeyay ee Muslim ah oo ay yeelato magaalada New York kadib markii uu u muuqday in uu ku guuleysanayo doorashada is-reebreebka xisbiga Dimoqraadiga ee magaaladaas oo dhacday habeenimadii Talaadada, inkastoo ay qaadan karto maalmo in lagu dhawaaqo natiijada kama dambeysta ah.

Kaddib markii la tiriyay 91% codadkii la dhiibtay ee wareegga koowaad ee is-reebreebka, Mamdani, oo ah xildhibaan ka tirsan golaha sharci-dejinta gobolka, wuxuu helay 43.5% codadka. Andrew Cuomo, oo ahaa barasabkii hore ee New York isla markaana ahaa shaqsiga ugu cadcaddaa illaa toddobaadyadii la soo dhaafay, ayaa helay 36.4%, wuxuuna qirtay guuldarradiisa habeenimadii Talaadada.

Isagoo ka hadlayay isu soo bax ololihiisa ah, wuxuu Cuomo sheegay in Mamdani uu galay “olole runtii caqli ku dheehnaa, wanaagsanaa, oo saameyn lahaa.” “Caawa waa habeenkiisii. Wuu u qalmay. Wuuna guuleystay,” ayuu yiri Cuomo. Brad Lander, oo ah hanti-dhawrka guud ee New York, ayaa galay kaalinta saddexaad isagoo helay 11.4%.

Magaalada New York waxay isticmaashaa nidaamka codbixinta ee kala-doorashada (ranked-choice voting), maadaama aysan u badneyn in labada musharrax midkoodna uu gaaro 50%, guddiga doorashooyinka ayaa hadda tiran doona codadka dadka ee doorashada labaad. Mamdani, oo toddobaadkii hore is-bahaysi la galay Lander, ayaa la saadaalinayaa inuu si weyn uga faa’iideysan doono tirintaas marka loo eego Cuomo.

Guusha lama filaanka ah ee Mamdani ayaa dhabar-jab ku noqon doonta hoggaanka sare ee xisbiga Dimoqraadiga, waxayna rajo gelin doontaa shaqsiyaadka kale ee jira dhanka bidixda-fog ee rajeynaya inay u tartamaan doorashooyinka kale ee dalka oo dhan.

Cuomo waxaa taageeray deeq-bixiyeyaal maalqabeenno ah waxaana taageeray shaqsiyaad badan oo dhexdhexaad ah, oo uu ku jiro Bill Clinton, laakiin Mamdani wuxuu ka faa’iideystay kacdoon taageero oo ballaaran oo ka yimid dhalinyarada gaar ahaan.

Isagoo hadlayay habeenimadii Talaadada, Cuomo wuxuu sheegay inuu taleefan u diray Mamdani si uu “ugu hambalyeeyo.”

“Wuxuu soo abaabulay olole aad u wanaagsan, wuxuuna taabtay dhalinyarada, dhiirigeliyey, kiciyey, wuxuuna ka dhigay inay soo baxaan oo ay codeeyaan,” ayuu yiri Cuomo. “Waxaan si daacad ah ugu ammaanayaa dadaalkiisa.”

Cuomo wuxuu u sheegay wargeyska New York Times in laga yaabo inuu weli u tartamo doorashada guud ee duqa magaalada ee bisha November isagoo ah musharrax madaxbannaan.

“Waxaan doonayaa inaan falanqeeyo oo aan la hadlo qaar ka mid ah asxaabteyda,” ayuu yiri.

Laakiin marka la eego sida ay magaalada New York ugu badan yihiin Dimoqraadiyiinta, iyo sida aan loo jeclayn duqa hadda xilka haya ee Eric Adams, Mamdani ayaa noqon doona kan ugu cadcad ee loo saadaalinayo inuu noqdo duqii 111-aad ee New York.

Tartanka loogu jiro xilka duqa magaalada New York ayaa si weyn isha loogu hayay guud ahaan dalka Mareykanka. Iyadoo ay isku wajaheen labo siyaasi oo Dimoqraadi ah oo aad u kala aragti duwan, waxay bixisay sawir muujinaya waxa ay cod-bixiyayaashu ka doonayaan xisbi ku dhibtooday inuu soo bandhigo aragti mideysan oo ka duwan tan Donald Trump.

Cuomo, barasabkii hore ee siyaasadda dhex-dhexaadka ah, iyo Mamdani ayaa usoo baxay inay yihiin labada musharrax ee ugu cadcad toddobaadyadii ugu dambeeyay ee is-reebreebka, iyadoo Mamdani uu soo yareeyay farqigii u dhexeeyay isaga iyo Cuomo kaddib markii uu helay xamaasad iyo taageero xooggan oo ka timid dhalinyarada New York.

Mamdani wuxuu rajeynayay inuu ka faa’iideysto nidaamka codbixinta ee is-reebreebka ee kala-doorashada, kaasoo u oggolaanaya cod-bixiyayaasha inay shan musharrax u kala horreysiiyaan sida ay u kala jecel yihiin.

Cuomo, oo loo doortay saddex xilli oo uu ahaa barasab ka hor inta uusan isku casilin ceeb kaddib eedeymo la xiriira faraxumeyn galmo, wuxuu tartanka galay isagoo aad uga magac weyn Mamdani, wuxuuna mar haystay 30 dhibcood oo uu kaga horreeyay ra’yi uruurinta. Laakiin sahan la sii daayay Isniintii ayaa muujiyay in Mamdani uu ku guuleysanayo is-reebreebka kaddib wareegyo badan oo tirin ah.

Mamdani wuxuu ku ololeeyay barnaamij bidix fog ah, isagoo ballanqaaday inuu hakinaayo kirada guryaha isla markaana uu basaska ka dhigayo kuwo bilaash ah magaalada oo dhan, ololihiisana waxaa hore u riixay taageerayaal badan oo uu ku leeyahay baraha bulshada oo aad uga badan kuwa la tartamayay.

Waxaa taageertay Alexandria Ocasio-Cortez munaasabad ay ka soo qeybgaleen kumanaan qof bishii Juun, wuxuuna sidoo kale helay taageerada Bernie Sanders, oo ah senetarka laga soo doorto gobolka Vermont.

Cuomo aad looma arkeyn, wuxuuna ka fogaaday isu soo baxyada waaweyn isagoo doorbiday kulamo si adag loo maamulay oo uu kula yeeshay xafiisyada ururada shaqaalaha iyo goobo kale oo yar yar. Markii uu tartanku isku soo dhowaaday, ololihiisa iyo ururada taageersanaa – oo qaarkood ay maalgelinayeen deeq-bixiyeyaal bilyaneero ah oo ka tirsan xisbiga Jamhuuriga – waxay si gaar ah diiradda u saareen inay weeraraan Mamdani, iyagoo malaayiin doollar ku bixiyay xayaysiisyo boostada lagu diro iyo kuwa telefishinka.

Wargeyska New York Times wuxuu tebiyay in Cuomo uu ka faa’iideystay in ka badan $25 milyan oo doollar oo ah kharash dibadda ah (outside spending) intii lagu jiray is-reebreebka, taasoo ah rikoor cusub oo magaalada ah.

Codbixinta hore waxay ka bilaabatay New York 14-kii Juun, magaaladuna waxay sheegtay in in ka badan 380,000 oo qof ay codkooda dhiibteen illaa Axaddii, taasoo laba jibaar ka badan tiradii codaysay doorashadii is-reebreebka ee 2021. Mowjad kulul oo Talaadadii jirtay – heerkulka New York wuxuu gaaray 100°F (38°C) – uma muuqan inay yareysay soo bixitaanka dadka, iyadoo lagu qiyaasay in ka badan 1 milyan oo qof ay codeeyeen, sida ay tebisay warbaahinta CBS New York.

Guuleystaha is-reebreebka looma dammaanad qaadayo inuu noqon doono duqii 111-aad ee magaalada New York, laakiin aad ayay u dhowdahay suurta-galnimadaas marka la eego magaalada ay si weyn uga badan yihiin Dimoqraadiyiinta diiwaangashan marka loo eego Jamhuuriga.

Duqa hadda xilka haya, Eric Adams, oo ku guuleystay doorashadii 2021 isagoo Dimoqraadi ah laakiin sanadkan u tartamaya musharrax madaxbannaan, si weyn loogama jecla magaalada. Sannadkii hore, Adams waxaa lagu soo oogay dacwado la xiriira inuu qaatay laaluush iyo inuu aqbalay tabarucaad olole oo shisheeye, laakiin dacwadahaas waa la laalay bishii Abriil kaddib markii ay soo faragelisay dowladdii Trump.

Washington (Caasimada Online) – Warbixin horudhac ah oo sir ah oo ay soo saareen sirdoonka Maraykanka ayaa sheegaysa in duqeymihii uu Maraykanku la beegsaday saddex xarumo nukliyeer oo Iiraan ku yaalla ay dib u dhigeen barnaamijka nukliyeerka ee dalkaas muddo dhowr bilood oo keliya ah, sida ay sheegeen saraakiil la socota natiijooyinka warbixinta.

Duqeymuhu waxay xireen afaafka hore ee laga galo laba ka mid ah xarumahaas, balse ma aysan dumin dhismayaashooda dhulka hoostiisa ku yaalla, sida ay saraakiishu sheegeen in natiijooyinka hore ay muujiyeen.

Weerarka ka hor, hay’adaha sirdoonka Maraykanka ayaa sheegay in haddii Iiraan ay isku daydo inay ku degdegto samaynta bam, ay ku qaadanayso muddo saddex bilood ah. Kadib duqeyntii Maraykanka iyo weerarro maalmo socday oo ay fuliyeen Ciidanka Cirka ee Israa’iil, warbixinta ay soo saartay Hay’adda Sirdoonka Difaaca (Defense Intelligence Agency) ayaa lagu qiyaasay in barnaamijkii dib u dhac ku yimid, balse uu ka yar yahay lix bilood.

Warbixinta ayaa sidoo kale lagu sheegay in inta badan keydkii Iiraan ee yuraaniyamta la hodmiyay la raray ka hor duqeymaha, kuwaasoo burburiyey qayb yar oo ka mid ah maaddada nukliyeerka. Waxaa suuragal ah in Iiraan ay qayb ka mid ah keydkaas u rartay goobo qarsoodi ah.

Qaar ka mid ah saraakiisha Israa’iil ayaa sheegay inay sidoo kale aaminsan yihiin in dawladda Iiraan ay lahayd xarumo yaryar oo qarsoodi ah oo lagu bacrimiyo (yuraaniyamta) si ay u sii wadan karto barnaamijkeeda nukliyeerka haddii weerar lagu qaado xarumaha waaweyn.

Saraakiil kale ayaa xustay in warbixintu ay ogaatay in saddexda xarun nukliyeer—oo kala ah Fordo, Natanz iyo Isfahan—uu soo gaaray khasaare isugu jira mid dhexdhexaad ah iyo mid daran, iyadoo xarunta Natanz ay ahayd tan ugu waxyeellada badan. Ma cadda in Iiraaniyiintu ay isku deyi doonaan inay dib u dhisaan barnaamijyadan.

Saraakiil hore ayaa sheegay in haddii Iiraan ay isku daydo inay si degdeg ah u samayso bam, uu noqon doono mid yar oo aan casri ahayn. In la soo saaro madax yar oo nukliyeer ah ayaa noqon lahaa mid aad uga sii adag, lamana oga inta uu le’eg yahay khasaaraha gaaray cilmi-baaristaas casriga ah.

Saraakiisha hadda iyo kuwii hore ee milateriga ayaa ka digay weerarka ka hor in dadaal kasta oo lagu doonayo in lagu burburiyo xarunta Fordo, oo ku aasan in ka badan 250 fiit buur hoosteeda, ay u baahan doonto duqeymo is xigxiga oo dhanka cirka ah, kuwaasoo maalmo ama xitaa toddobaadyo lagu garaacayo isla goobihii.

Diyaaradaha dagaalka ee Maraykanka ayaa ugu yaraan laba jeer ku dhuftay isla goobihii maalintii Sabtida. Diyaaradaha nooca B-2 ayaa 12 bambo oo ah nooca GBU-57—oo inta badan loo yaqaan “kuwa burburiya dhufaysyada”—ku riday Fordo, waxaana hadda muuqda lix godad oo ka samaysmay meelihii laga galayay ee dhulka ku kor yaallay, sida uu sheegay Brian Carter, oo ah maamulaha qaybta Bariga Dhexe ee machadka American Enterprise Institute.

Laakiin khubaro badan oo ku takhasusay bambooyinka milateriga ayaa aaminsanaa in loo baahan doono duqeymo ka badan hal maalin si shaqada loo dhammeeyo.

Qiimeynta hordhaca ah ee khasaaraha ayaa muujineysa in sheegashadii Madaxweyne Trump ee ahayd in xarumaha nukliyeerka ee Iiraan “gebi ahaanba la burburiyey” ay ahayd mid la buunbuuniyey.

Aqalka Congress-ka ayaa loo qorsheeyay in warbixin laga siiyo duqeynta maalintii Talaadada, waxaana xildhibaannada laga filayay inay su’aalo ka weydiiyaan natiijooyinka, balse kulankaas waa la baajiyey. Senator-rada ayaa hadda la filayaa in warbixinta la siiyo maalinta Khamiista, halka koox Dimoqraadiyiin ah oo ka tirsan Aqalka Wakiillada ay soo saareen bayaan ay ku dalbanayaan in aqalkooda sidoo kale warbixin la siiyo.

Tan iyo markii ay duqeymuhu dhaceen, Mr. Trump ayaa si isdaba joog ah ugala cawday la-taliyeyaashiisa warbixinnada saxaafadda ee su’aal geliyey inta uu le’eg yahay khasaaraha la geystay, sida ay sheegeen dad la socda hadalladiisa. Waxa uu sidoo kale si dhow ula socday hadallada ay saraakiisha kale ka sheegaan warbaahinta marka wax laga weydiiyo khasaaraha gaaray xarumaha nukliyeerka, sida ay hadalka u dhigeen.

Bayaan uu soo saaray maalintii Talaadada, Xoghayaha Difaaca Pete Hegseth ayaa ku celiyay qiimeyntii hore ee Mr. Trump.

“Marka la eego wax kasta oo aan aragnay—aniguna dhammaan waan arkay—ololaha duqeynteennu wuxuu tirtiray awooddii Iiraan ee ahayd inay abuurto hub nukliyeer ah,” ayuu yiri. “Bambooyinkeenna waaweyn waxay si sax ah ugu dhaceen goobtii loogu talagalay ee bartilmaameed kasta, si qumman ayeyna u shaqeeyeen.”

Saraakiisha ayaa ka digay in warbixintan sirta ah ee ka kooban shanta bog ay tahay oo keliya qiimeyn hordhac ah, ayna jiri doonaan kuwo kale oo soo bixi doona marka xog dheeri ah la soo ururiyo iyo marka Iiraan ay baarto saddexda xarun. Mid ka mid ah saraakiisha ayaa sheegay in warbixinnada la tusay dadka ka tirsan maamulka ay ahaayeen “kuwo is-khilaafsan” balse ay weli dhiman yihiin qiimeyno kale oo la samayn doono.

Si kastaba ha ahaatee, warbixinta Hay’adda Sirdoonka Difaaca waxay tilmaamaysaa in xarumahaasi aysan u waxyeelloobin sidii ay saraakiisha qaar ee maamulka rajaynayeen, iyo in Iiraan ay weli gacanta ku hayso ku dhowaad dhammaan maaddadeedii nukliyeerka, taasoo macnaheedu yahay haddii ay go’aansato inay samayso hub nukliyeer ah inay weli awood u yeelan karto inay si degdeg ah u samayso.

Saraakiisha waraysigan lala yeeshay waxay codsadeen inaan magacooda la sheegin sababtoo ah natiijooyinka warbixintu weli waa sir.

Aqalka Cad ayaa ka horyimid qiimeyntan. Karoline Leavitt, oo ah afhayeenka Aqalka Cad, ayaa sheegtay in natiijooyinka warbixintu ay yihiin “kuwo gebi ahaanba khaldan.”

“In la faafiyo warbixintan qiimeynta ah ee lagu andacoonayo waa isku day cad oo lagu doonayo in lagu wiiqo Madaxweyne Trump, laguna sumcad dilo duuliyeyaasha geesiyaasha ah ee fuliyay hawlgalka si qumman loo qabtay ee lagu baabi’inayay barnaamijka nukliyeerka Iiraan,” ayay ku tiri bayaankeeda.

“Qof walba wuu ogyahay waxa dhacaya marka aad 14 bambo oo miisaankoodu yahay 30,000 oo pound si qumman ugu riddo bartilmaameedyadooda: waa burbur dhamaystiran.”

Qaybo ka mid ah warbixintan sirdoonka waxaa hore u tabisay warbaahinta CNN.

Duqeymuhu waxay si weyn u waxyeeleeyeen nidaamka korantada ee xarunta Fordo, sida ay saraakiishu sheegeen. Ma cadda inta ay ku qaadan doonto Iiraan inay gasho dhismayaasha dhulka hoostiisa, dayactirto nidaamka korantada, ayna dib u rakibto qalabkii meesha laga raray.

Shaki kuma jiro in ololaha duqeynta uu “si aad iyo aad u xun” u waxyeeleeyay saddexda xarun, ayuu yiri Mr. Carter.

Laakiin qiimeynta hordhaca ah ee khasaaraha ee Israa’iil ayaa sidoo kale su’aalo ka keenay waxtarka duqeymaha. Saraakiisha difaaca Israa’iil ayaa sheegay inay sidoo kale soo ururiyeen caddeymo muujinaya in xarumihii dhulka hoostiisa ku yaallay ee Fordo aan la burburin.

Duqeynta ka hor, milateriga Maraykanku wuxuu siiyay saraakiisha dhowr suurtagal oo ku saabsan inta uu weerarku dib u dhigi karo barnaamijka Iiraan. Qiyaastaas waxay u dhaxeysay dhowr bilood oo ah heerka ugu hooseeya ilaa sannado oo ah heerka ugu sarreeya.

Qaar ka mid ah saraakiisha ayaa ka digay in qiyaasaha noocan oo kale ah aysan ahayn kuwo sax ah, aysana suurtagal ahayn in la ogaado sida saxda ah inta ay Iiraan ku qaadanayso inay dib u dhisato, haddii ay doorato inay sidaas samayso.

In kasta oo ay jiraan sheegashooyin ah in xarumaha la baabi’iyay oo ka yimid Mr. Trump iyo Mr. Hegseth, Janaraal Dan Caine, Taliyaha Guud ee Taliyeyaasha Isku-dhafka ah ee Ciidamada, ayaa ka taxaddaray qaabka uu u sifeeyay saameynta weerarka.

“Hawlgalkan waxaa loogu talagalay in si weyn loogu wiiqo kaabayaasha hubka nukliyeerka ee Iiraan,” ayuu Janaraal Caine ka sheegay shir jaraa’id oo uu qabtay Axaddii.

Qiimeynta ugu dambeysa ee khasaaraha dagaalka ee hawlgalkii milateri ee ka dhanka ahaa Iiraan, ayuu Janaraal Caine sheegay Axaddii, isagoo garab taagan Mr. Hegseth, inay weli soo socoto. Wuxuu sheegay in qiimeynta hordhaca ah ay muujisay in saddexda xarunba ay soo gaartay “waxyeello iyo burbur daran.”

Janaraal Caine wuxuu intaa ku daray inay “aad u horayso” in la qiimeeyo inta ka hartay barnaamijka nukliyeerka Iiraan.

Janaraal Joseph L. Votel, oo hore u ahaa taliyaha Taliska Dhexe (Central Command), ayaa sheegay wareysi uu bixiyay, inuu “kalsooni weyn ku qabo nidaamyada hubka ee la isticmaalay.” Laakiin wuxuu intaa ku daray: “Lama yaabani in qaybo ka mid ah ay badbaadeen. Taasi waa sababta loo sameeyo qiimeynta khasaaraha dagaalka, maxaa yeelay wax walba way u dhici karaan sidii loo qorsheeyay laakiin waxaa weli jira arrimo kale.”

Dhageysi ka dhacay Golaha Senate-ka maalintii Talaadada, Dimoqraadiyiintu waxay sidoo kale muujiyeen taxaddar dheeraad ah.

“Weli waxaan sugaynaa qiimeynta kama dambaysta ah ee khasaaraha dagaalka,” ayuu yiri Senator Jack Reed oo laga soo doorto Rhode Island, ahna ninka ugu sarreeya Dimoqraadiyiinta ee Guddiga Adeegga Ciidamada Qalabka Sida.

Saraakiisha milateriga ayaa sheegay in si khasaare la taaban karo loogu geysto xarumaha dhulka hoostiisa, ay tahay in lagu dhufto duqeymo isdaba joog ah. Laakiin Mr. Trump wuxuu ku dhawaaqay inuu joojin doono duqeymaha ka dib markii uu ansixiyay wejigii hore.

Hay’adaha sirdoonka Maraykanka ayaa ku soo gabagabeeyay duqeymaha ka hor in Iiraan aysan gaarin go’aanka ah inay samayso hub nukliyeer ah, laakiin ay haysato yuraaniyam la hodmiyay oo ku filan oo haddii ay go’aansato inay samayso bam, ay si degdeg ah ku samayn karto.

In kasta oo saraakiisha sirdoonku ay saadaaliyeen in duqeyn Maraykanku la beegsado Fordo ama xarumo kale oo nukliyeer ah ay ku dhiirigelin karto Iiraan inay samayso bam, saraakiisha Maraykanka ayaa sheegay inaysan weli ogeyn haddii Iiraan ay sidaas samayn doonto.

Wakiillada Hay’adda Sirdoonka Difaaca kama aysan jawaabin codsiyo faahfaahin ah oo loo diray.