Garoowe (Caasimada Online) – Maamulka Puntland ayaa mar kale si cad oo adag u xaqiijiyay sheegashadiisa ku saabsan gobollada Sool, Sanaag iyo Cayn (SSC), isagoo ku dhawaaqay in dhulalkan ay weli yihiin qayb rasmi ah oo ka tirsan Puntland, sida ku xusan dastuurka maamulka.
Hadalkan ayaa si toos ah uga jawaabaya go’aankii dhawaan dowladda federaalka Soomaaliya ay ku aqoonsatay maamulka SSC-Khaatumo inuu yahay dowlad-goboleed buuxa oo ka tirsan nidaamka federaalka.
Wasiirka Warfaafinta Puntland, Maxamuud Caydiid Dirir, ayaa sheegay in aysan jirin wax hannaan sharci ama dastuur ah oo SSC-Khaatumo kaga baxay Puntland.
“Gobollada SSC waxay si cad ugu xusan yihiin dastuurka Puntland. Ma jirto wax ka go’itaan ah, mana dhicin in meel la iskaga baxay. Puntland waxaa lagu aas-aasay heshiis bulsho oo ku dhisan dastuur, kaasoo qeexaya dhammaan gobolladii salka u ahaa dhismaheeda. Dastuurkaas wali waa dhaqan mana jirto wax wax-ka-beddel ah oo lagu sameeyay,” ayuu yiri Dirir shir jaraa’id oo uu ku qabtay magaalada Garowe.
Wuxuu sidoo kale si adag u dhaleeceeyay waxa uu ku tilmaamay isku day ay madaxda SSC-Khaatumo ku sheeganayaan dhul ka mid ah Puntland, gaar ahaan qeybo ka mid ah gobolka Sanaag, isagoo ku sifeeyay arrintaasi mid aan la aqbali karin oo keeni karta xasilooni darro.
Dirir wuxuu carrabka ku adkeeyay in isbeddel kasta oo ku yimaada xuduudaha Puntland uu noqon karo mid keliya oo ku yimaada wadatashi ballaaran iyo heshiis bulsho oo dhex mara shacabka Puntland.
Inkastoo Puntland ay horey uga baaqsatay inay si rasmi ah uga jawaabto aqoonsigii dowladda federaalka ee SSC-Khaatumo, hadalkan cusub ayaa si cad u diiday sharciyadda maamulkaasi. Maamulka SSC-Khaatumo wali si rasmi ah ugama jawaabin hadalka kasoo yeeray Puntland.
Dhankooda, madaxda SSC-Khaatumo ayaa horay u difaacay wada-shaqeynta ay la leeyihiin dowladda federaalka, iyagoo ku andacoonaya in Puntland ay si joogto ah uga reebtay go’aamada muhiimka ah. Waxay sidoo kale sheegeen in ka qaybgalka ay ku leeyihiin nidaamka federaalka uu yahay xaq sharci ah oo ay ku doonayaan matalaad iyo madax-bannaani siyaasadeed.
Go’aanka dowladda federaalka ee ku saabsan aqoonsiga SSC-Khaatumo inay tahay dowlad-goboleed dhameystiran ayaa sare u qaaday xiisadda u dhexeysa labada maamul, iyadoo falanqeeyayaal iyo diblomaasiyiin ay ka digayaan in khilaafka sii kordhaya uu khatar gelin karo xasiloonida iyo nidaamka dowlad-dhiska ee gobollada waqooyi ee Soomaaliya.