Garoowe (Caasimada Online) – Maamulka Puntland ayaa Madaxweynaha Soomaaliya Xasan Sheekh Maxamuud ku eedeeyay inuu burburiyay ciidamadii Eritrea kusoo qaatay tababarka adag ee ku maqnaa sanadaha.
Wasiirka Warfaafinta Maamulka Puntland Eng. Maxamuud Caydiid Dirir ayaa sheegay in dowladda federaalka aysan wax istaraatiijiyad ah ka laheyn dagaalka socda ee Al-Shabaab ka dhanka ah, maadaama ay burburisay ciidankii Eritrea lagu soo tababaray, sida uu hadalka u dhigay.
Ciidankaas ayuu sheegay in ay ku filnaayeen inay kooxda Al-Shabaab soo afjaraan, maadaama ay soo qaateen tababar aad u adag, balse taasi bedelkeeda ay fadhiid iska xareysan ka dhigtay dowladda Xasan Sheekh.
“Waad garan kartaa ciidan fara badan oo tababaran oo dhallinyaro u badan, oo xaalad kasta iyo cimilo kaste lagu tababaray oo shan kun gaaraya ayaa Eritrea laga keenay. Shantaas kun ayaa Shabaab ka adkaa, haddii si fiican loo maamulo,” ayuu yiri Wasiir Maxamuud Caydiid Dirir.
Sidoo kale waxa uu dowladda federaalka ku eedeeyay inay dayacday ciidankeeda, isagoo tilmaamay in kooxda Al-Shabaab ay maalin kasta meel cidlo ah ku laynayaan ciidanka dowladda.
“Madaxweyne Xasan Sheekh Maxamuud iyo dowladdiisa iyaga ayaa masuul ka ah istaraatiijiyad la’aanta lagu laynayo ciidanka dowladda,” ayuu hadalkiisa sii raaciyay wasiirka.
Dhinaca kale, wasiirka ayaa waxa uu sheegay in dowladda federaalka oo uu kala dhaxeeyo khilaaf siyaasi ah aysan Puntland lasoo wadaagin xogaha Al-Shabaab, xilli dalka uu ka socdo dagaal dhanka ah.
“Puntland waxay halis ugu jirtaa Shabaab-ka ka baxsanaya howl-gallada ka socda gobollada dhexe in ay deegaanadooda kusoo dhuuntaan,” ayuu tilmaamay wasiirka oo muujiyay walaac la xiriira hanaanka dowladda ku waddo dagaalka iyo xog isdhaafsi la’aanta laamaha amniga.
Waxa uuna sheegay in ka maamul ahaan ka warqabaan in saraakiil baxsaday oo aan la ogeyn halka ay ku sugan yihiin, kuwaasi oo ka firxaday gulufka culus ee ka socda gobollada dhexe ee dalka.
Arrintaan ayaa imaneysa, xilli dagaalka gobollada dhexe looga saarayo Al-Shabaab loo qorsheeyey waqti kooban, si Koonfurta Soomaaliya looga bilaabo howl-gallo militeri oo ay ka qeyb qaada doonaan ciidamada wadamada safka hore, sida ay horay u sheegeen madaxda dowladda federaalka.
