Raad-Raaca dambiyadi Gen. Maxamed Dhacdadii Dahablaha X/Weyne + Video

By Asad Cabdullahi Mataan

Waxaan ku noolahay qurbaha, ma na doonaayo inaan sheego halka ay tahay iyo magacaygaba, maxaa yeelay waxaan doonayaa berrito in aan dalkayga hooyo ku soo noqdo anigoo ka baqayn in lay beegsado, sida hadda ka socoto Muqdisho gaar ahaan, Soomaaliya guud ahaan.

Waxaan u ahaa macmiil dahable Xuseen Kasow, dukaankiisu ku yaallay Xamar Weyne, meeshii dahableyaasha, agagaarka Kawaanki kalluunka.

Dhowr jeer ayuu odaygayga iiga iibiyay dahab, beri Samaadki, annagoo Muqdisho ku wada nool. Ninkayga wuxuu ahaa qareen, ama sharci yaqaan.

Galab aan tagnay dukaanka dahablaha Xuseen Kasow, ayuu ninkan milkiilaha ah nagu cabaaday, Isla markaana uu weydiiyay ninkayga haddii ay qareen ahaan u qabsan karaan isaga iyo dahableyaasha kale.

Waxaa uu dahable Xuseen Kasow si ba’an uga cabanayay ninkan hadda Boliiska loo dhiibay ee Maxamed Xasan Ismaaciil Faarax (Ilka-Siibe) magaciisu yahay, markaana ahaa madaxa Laanta Dembi Baarista Gobolka Banadir, xafiiskiisuna ku yaallay agagaarka km 4, wasaaradihii agtooda.

Falalka foolxumada iyo dhaca ahaa ee awood sheegashada ku salaysnaayeen ee dahable Xuseen Kasow ka cabanayay waxaa ay ahaayeen iyadoo ninkan mas’uulka ahaa uu goor walba u tegayay dahableyaasha si uu dahab uga baado.

Anigoo aad uga naxsanaa murugta ninkan dahablaha ah ka muuqatay, ayaan weli xusuustaa hadallidiisii sidan u dhigna:

“Waxaa uu sarkaalkan noo keenaa habeen walba gabarta uu markaas la baashaalayo, isagoo lacag naga siin ayuu intuu set dahab ah u xiro ka dhaqaaqaa irridda dukaanka! Sida uu dahabku yahay hanti uu leeyahay annaguna aan nahay shaqaale u shaqeeya ayuu amar nagu siiyaa hadba dahabka ay gabartu ka hesho in aan u soo saarno, baqdin darted ayaan annago aad ugu dhib qabna ka yeelnaa. Haddaba hadii aad tahay qareen ma naga difaaci karaysaa ninkan haddii aan maxkamad la aadno inteennaan dahableyaasha Xamar Weyne ah?”

Markaa odaygaygu waxaa uu ahaa shaqaale dowladeed, oo ku ma uu shaqaynaynin xirfaddiisa aqooneed ama qareennimo. Hase yeeshee ilaa iyo iminka ma aan illoobin caloolwowgii ka muuqday ninkaas ganacsada ahaa.

Waxaan Ilaah ka baryaa in uu weli nool yahay oo uu soo hadlo, waxaan u maleeyaa in ay u haajiren isaga iyo walaalihiis, oo dahableyaal wada ahaa, dhanka iyo Dubai.

Waxaa ka argagaxaa xaq darrada oo ila iyo hadda ka socota Muqdisho, madaxda sarena ay ka indha saab teen.

Ninka ra’sul wasaaraha ah u ma qalmo xilka uu hayo, waxaanna leeyahay WERIYE KOLOMBO XAAL QAADO, Soomaalina digniintii aad siisay markii ninkan loo magacaabay Ra’iisul Wasaarennimo, in ay abaalkeeda kaa siiyaan ayaan Rabbi ka rajaynayaa. Waxaa tahay geesi waddani ah oo xilkiisii ku waayay Waajibkiisii uu gudanayay awgeed.

Madaxweyne Xasan Sheekhna waxaa uu noqday nin ay ceeb karin, dan barteedna ka leheen Soomaaliya, Mudane Saacid aad ayaa uu uga gardarnaa ee ha la soo celsho (waa hadduu yeelayo).

Booliska Soomaaliyeed sharaftii iyo darajadii uu shacabkiisa ku dhex laha, ma jiraan maanta iyo wixii ka dambeeya, haddiiba tuug uu usha u hayo.

Halkan ka daawo video gaar ah oo ay Caasimada Online heshay, kuna saabsan dambiyadii uu galay General Ilka-Siibe

Wabillaahi Towfiiq
Soomaaliyey xaqa raadiya, Billaahiye xaqa u dirira, Dad ayaa naftooda qaaligaa u huray!

Allow Soomaaliya ka dul qaad kuwa baabi’inaya ee aan oggolayn horumarkeeda. AAMIIN