Dhuusamareeb (Caasimada Online) – Faah-faahino dheeraad ah ayaa waxaa laga helayaa dhacdo argagax leh oo xalay ka dhacday magaalada Dhuusamareeb ee caasimada Galmudug, kadib markii la gubay Masjid ku yaalla xaafadda Horseed ee magaaladaasi.
Wararka ayaa sheegaya in koox aan la aqoonsan ay geysteen falkan, iyaga oo dab qabadsiiyay Masjidka, kadibna goobta ka baxsaday.
Dabka ayaa saameeyay guud ahaan dhismaha Masaajidka, waxaana ku basbeelay dhammaan agabkii yiilay oo ay ku jiraan Kutubtii Qur’aanka ee dhex yiilay Masajidka.
Sidoo kale waxaa gebi ahaan burburay Masajidka, sida laga arki karo Sawirro lagu baahiyay baraha bulshada, kuwaas oo muujinaya baaxadda uu lahaa dabka.
Sidoo kale qaar kamid ah culimada gacanta ku heysay Masjidka oo la hadlay warbaahinta ayaa shaaca ka qaaday in dhowr jeer ay la kulmeen hanjabaadyo iyo dhagax tuur lagu hayay Jameecada Masjidka,haddana ay usoo xigtay weerarka lagu gubay Masaajidka.
Masjidkan la gubay ayaa qayb ka ah xarumaha Diinigaee hoostaga dariiqada Axmadiyadda ee Ahlu Sunna Waljamaaca, sida ay innoo sheegeen qaar kamid ah dadka deegaanka.
Arrintan ayaa dhalisay hadal heyn xoogan, mana jiro wax hadal ah oo illaa iyo hadda kasoo baxay saraakiisha laamaha ammaanka Galmudug oo ku aadan dhacdadaasi.
Sidee looga falceliyay?
Cabdikariin Carab oo kamid ah dadka isticmaala baraha bulshada ayaa arrintan uga falceliyay “Qofkii guri Allah gubey iyo kii la damcaba asagaa xisaabi u taal”.
Sahra Cabdi Barre ayaa iyaduna tiri “Halka Masjid ayaa meesha ugu yaal Axmadiye qolada gubtayna waa la iska ogyahy ee tilaabo hala qaado”.
Deeq Cabdallla ayaa isna ku jawaabay “Waa arrin ugub ah oo ah wax laga xumaado…bayd ilaahay qofka gubay .. ujeedaduu doono ha kala haadee waa qof aan wax fahamsiisneen”.
Cabdishakuur Xiimaa ayaa isna dalbaday in baaritaan lagu sameeyo falkan “Waa ficil argagax leh wllhi baaritaan waa in lagu sameeyo”.
