Garoowe (Caasimada Online) – Ammaanka magaalooyinka waaweyn ee maamulka Puntland ayaa aad loo adkeeyay, waxaana meel kasta lagu arkayaa ciidamo aad u fara badan.
Arrintan ayaa ka dambeesa Puntland oo u dabaal dageysoa 16-sanno guuradii ka soo wareegtay markii la aasaasay maamulkaas.
Dad weyne fara badan ayaa isugu soo baxay waddooyinka waaweyne ee magaalooyinka Garoowe, Boosaaso, Gaalkacyo iyo Qardho.
Madaxweynaha maamulka Puntland, Cabdiweli Maxamed Cali Gaas oo si kooban ula hadlay dadweyne isugu soo baxay barxad ku taalla Garoowe ayaa sheegay in uu aad ugu faraxsan yahay 16-sanno guuradii ka soo wareegatay aas-aaska maamulka Puntland wuxuuna sheegay in khubada uu ugu talagalay munaasabada uu ka jeedin doono caawa munaasabad ka dhaceysa xarunta baarlamaanka.
Xuska 16-sanno guuradii ka soo wareegtay aas-aaska maamulka Puntland ayaa ku soo aadaya iyadoo maamulka Puntland ay ku dhawaaqeen in ay xiriirka u jartay dowladda fedaraalka Soomaaliya.
Madaxweynaha maamulka Puntland ayaa ku dhawaaqay in dhammaan xubnaha Puntland uga jira xildhibannada baarlamaanka ay ku soo laabtaan muddo 15-cisho ah.
Puntland ayaa ka carootay heshiis maalintii Arbacadii ka dhacay xarunta Villa Somalia kaasoo la sheegay in lagu dhisaayo maamul gobaleed loo dhiso gobalada dhexe.
Caasimada Online
Xafiiska Wararka Garoowe
