Muqdisho (Caasimada Online) – Ra’iisul Wasaaraha Soomaaliya Mudane Xamza Cabdi Barre ayaa maanta Wasiirada saddex wasaaradood ka guddoomay ballan-qaadka qorshe-howleedka sanadka cusub ee 2023.
Saddexdaan Wasiir ayaa kala ahaa Wasiirka Qorsheynta, maal-gashiga & horumarinta dhaqaalaha, Maxamuud Cabdiraxmaan Beenebeene, Wasiirka ganacsiga & warshadaha, Mudane Jibriil Cabdirashiid Xaaji Cabdi iyo Wasiir ku-xigeenka arrimaha gudaha, dib-u-heshiisiinta & federaaleynta ahna ku-simaha Wasiirka, Mudane Cabdixakiim Xasan Ashkir.
Ra’iisul Wasaare Xamza ayaa ka dhageystay, islamarkaana su’aalo muhiim ah ka weydiiyay masuuliyiinta wasaaradaha qorshooyinka hawleed iyo ballan-qaadyada waxqabad ee ay soo bandhigeen, kuwaasi oo la doonayo in la fuliyo sanadka cusub ee 2023, iyada oo lagu saleynayo siyaasadda iyo barnaamijka xukuumadda Dan-Qaran.
Xamza ayaa waxa uu kula dardaarmay wasiirrada in la xoojiyo wada-shaqaynta ka dhaxeysa hay’adaha kale ee dowladda, Isla-xisaabtanka iyo daahfurnaanta, si guulo wax ku ool ah looga gaaro arrimaha horqabadka u leh Xukuumadda.
Ra’iisul Wasaaraha ayaa muddooyinkii dambe ka guddoomayay Wasiirada xukuumadiisa ballan-qaadka qorshe-howleedka sanadka cusub ee 2023, taasi oo qeyb ka ah isla xisaabtanka iyo korjoogteynta howlaha shaqo ee xukuumadda.
