Belgrade (Caasimada Online) – Taliyaha Ciidanka Booliska Soomaaliyeed Jeneraal Sulub Axmed Firin ayaa soo gabagabeeyey safar qaatay afar maalmood oo uu tegay magaalada Belgrade ee dalka Serbia, halkaas oo taliye Sulub uu kula kulmay madaxda ugu sareysa booliska dalkaas.
Wasiirka Arrimaha Gudaha Serbia oo taliska booliska dalkaas uu hoostago, Taliyaha guud ee Booliska, ku xigeenadiisa, Taliyaha Arrimaha Dibadda, Taliyaha Booliska Interpol iyo saraakiisha hoggaanada qeybaha booliska ee dalka Serbia ayuu kulamo xiriir ah la yeeshay Taliyaha booliska Soomaaliyeed.
Madaxda booliska labada dalka ayaa ka wadahadlay sidii ay isaga kaashan lahaayeen dhinacyada la dagaalanka argagixisada, musuq, dambiyada ka dhaca xuduudaha, dambi barista iyo tababarrada ciidamada.
Madaxda booliska labada wadan waxay ku heshiiyeen inay si toos ah u soo celiyaan xiriirkoodii, waxaana heshiiska la gaaray uu xusayaa in sanadkaan dhamaadkiisa 45 sarkaal oo booliska Soomaaliyeed ka tirsan ay tababar u tegayaan dalka Serbia.
Sidoo kale sanadka xiga waxaa dalka Serbia tababar ku soo qaadan doona ku dhawaad 100 sarkaal oo kale, sida ku xusan heshiiska uu Taliyaha ciidanka booliska Soomaaliyeed la soo galay taliska booliska dalka dalka Serbia.
Sanadkii 1962-kii ayuu soo bilowday xiriirka booliska Soomaaliya iyo kan dalka Serbia, inkastoo uu hakad galay sanadkii 1992-kii, balse dib u furidii safaaradda Soomaliya ee Belgrade ayaa suurta-gelisay dib u soo celinta xiriirka labada boolis.
Dowladda Serbia waxay ka mid tahay dalalka caalamka ee dowladda Soomaaliyeed ku garab siiya dib u dhiska hey’adeheeda muhiimka ah.
