Muqdisho (caasimada Online) – Waxaa dhawaan la filayaa inuu Ra’isulwasaaraha cusub ee Soomaaliya Xasan Cal Kheyre ku dhawaaqo golaha wasiiradiisa cusub oo la filayo inay noqon doonaa shaqsiyaad dalka wax ka badali karo.
Haddaba xog hoose oo la isku haleyn karo oo ay heshay Shabakadda Caasimadda Online ayaa xaqiijinayo shaqsiga uu Xasan Cali Kheyre ka dhigi doono wasiirka Arrimaha Gudaha oo ah mid kamid ah wasiirada loo yaqaan (A) oo ay ku hardamayaan beelaha ugu tunka weyn Soomaliya.
Xogtaan ayaa sheegeyso inuu Xasan Cali Kheyre wasiirka Arrimaha gudaha ka dhigi doono Thaabit Cabdi Maxamed oo horey u ahaa agaasimihii madaxtooyada Villa Soomaaliya xilligii uu Xasan Shiikh madaxweymaha ahaa inkastoo bilooyin kadib xilkaas laga qaaday.
Thabit oo ah shaqsi kasoo jeedo Beesha Abgaal ayaa markii dambe wuxuu Xasan Shiikh Maxamuud ku daray diblomaasiyiinta safaaradda Soomaaliya ee Turkiga ka hor inta uusan si rasmi ah ugu biirin ololihii lagu soo saaray Maxamed Cabdulaahi Farmaajo.
Thabit ayaa lagu sheegaa inuu yahay saaxiib aad ugu dhaw madaxweynaha sidoo kalana wuxuu kaalin weyn ka qaatay ololihii Xasan Shiikh Maxamuud looga tuuray xilka madaxweynimo ee Soomaaliya.
Thabit waa aqoonyahan markiisii hore ka imaaday dalka Ingiriiska sanado badan oo uu halkaas ku noolaa kadib ayuu kusoo biiray siyaasadda Soomaaliya wuxuuna xilligaas garab weyn ka helay madaxweynihii hore Xasan Shiikh Maxamuud oo ay qaraabo dhaw yihiin.
Dadka ku dhaw dhaw xafiisyada madaxweynaha iyo Ra’isulwasaaraha ayaa xaqiijinayo inuu Thabit 95% u badan tahay in xilkaas loo dhiibo waxaana lagu sheegaa inuu yahay shaqsi firfircoon kana dambeeyo sharciga.